काठमाडौं (हाम्रो खेलकुद) – मकवानपुरले चार जिल्ला सम्मिलित भिजिट भरतपुर टि२० सिरिजको उपाधि जितेको छ । भरतपुर १५ स्थित गौतम बुद्ध अन्तर्राष्ट्रिय क्रिकेट रंगशालाको नमुना मैदानमा भएको फाइनल खेलमा चितवनलाई ५ विकेटले हराउँदै मकवानपुरले उपाधि जितेको हो ।

जितको लागि १ सय २४ रनको विजयी लक्ष्य पछ्याएको मकवानपुरले १९ ओभरमा ५ विकेट गुमाउँदै पूरा गर्यो । मकवानपुरको जितमा सुभ कंसाकारले २३ बलमा २ चौका र २ छक्कासहित २७ रन बनाए । तक्षक सिंखडाले २४, रिजन ढकालले २३, र सक्षम बस्ताकोटीले २० रन बनाए ।

चितवनका दिवस आचार्य र दिपेश श्रेष्ठले २र२ विकेट लिए । दानिस इकबालले एक विकेट लिए । त्यसअघि टस जितेर ब्याटिङ रोजेको चितवनले निर्धारित २० ओभरमा ९ विकेट गुमाउदै १ सय २३ रन बनाएको थियो । सुरुवाती ७ ओभरमा ३२ रन जोड्दा ४ विकेट गुमाएको चितवन त्यसपछि खेलमा फर्किएको थियो ।

चितवनका लागि क्रिजन गुरुङले २२ बलमा २ चौका र २ छक्कासहित सर्वाधिक ३१ रन बनाए । १९ बलमा २० रन बनाएका दिपेश श्रेष्ठ रोहित ठाकुरको बलमा बोल्ड आउट भए ।

बलिङमा मकवानपुरका समिर चौलागाईले ३, रोहित ठाकुरले २ तथा रिजन ढकाल, असिम श्रेष्ठ र साकार गजुरेलले समान १ विकेट लिए । १ विकेटसहित नटआउट २३ रन बनाएका मकवानपुरका रिजन ढकाल खेलको प्लेयर अफ द म्याच बने ।

सिरिजका उत्कृष्ट बलर रिजन ढकाल भए । उनले १३ विकेट लिएका थिए । प्रतिक श्रेष्ठ ९५ रन बनाउँदै उत्कृष्ट ब्याटर भए । प्लेयर अफ द सिरिज मकवानपुरका रिजन ढकाल बने । वेष्ट क्याचको उपाधी पर्साका सम्साद मन्सुरीले पाए ।