एजेन्सी – भारतीय तीव्र गतिका बलर मोहम्मद शिराजलाई अन्तर्राष्ट्रिय क्रिकेट परिषद् (आइसिसी) ले कारबाही गरेकोछ ।

अष्ट्रेलियासँगको दोस्रो टेस्ट खेल एडिलेडमा ट्रविस हेडलाई आउट गरेपछि गरेको अस्वभाविक सेलेब्रेसनको कारण आइसिसीले उनलाई एक डेमिरिट प्वाइन्ट दिनुको साथै २० प्रतिशत म्याच फि रकम काट्दै कारबाही गरेको हो ।

त्यस्तै हेडलाई पनि एक डेमिरिट प्वाइन्ट दिएकोछ । २४ महिना भित्र एक खेलाडीलाई ४ डेमिरिट प्वाइन्ट मिलेको खण्डमा एक टेस्ट, दुई ओडिआई वा टि ट्वान्टी आई खेल्न प्रतिबन्ध लाग्नेछ ।

हेडले पहिलो इनिङमा भारतविरुद्ध १ सय ४० रनको शतकीय इनिङ खेलेका थिए । उनलाई बोल्ड गरेपछि शिराजले आक्रोसित रुपमा केही भन्दै पेभेलिएन जान भनेका थिए । शिराजलाई हेडले पनि जवाफ फर्काएका थिए । मैदानमा खेल भावना विपरित भनाभन भएको हुँदा कारबाही गरेको हो ।

दोस्रो टेस्ट खेलमा अष्ट्रेलिया १० विकेटले विजयी भएको थियो । पहिलो टेस्ट अष्ट्रेलियाले २ सय ९५ रनले हारेको थियो । पाँच टेस्ट खेलको सिरिज १-१ को अवस्थामा छ ।

तेस्रो टेस्ट १४ डिसेम्बरदेखि सुरु हुनेछ । आइसिसी विश्व टेस्ट च्याम्पियनसिप २०२५ को फाइनलमा स्थान बनाउन भारतले बाँकी तीनै खेल जित्नुपर्ने हुन्छ ।