काठमाडौं(हाम्रो खेलकुद) – हङकङ यु १९ विरुद्धको ३ एकदिवसीय सिरिजमा नेपालले क्लिन स्विप गरेको छ ।

सिरिजकि तेस्रो तथा अन्तिम खेलमा शुक्रवार १ सय ३० रनको सहज जितका साथ नेपालले सिरिज क्लिन स्विप गरेको हो । नेपालले पहिलो खेल ३ विकेट तथा दोस्रो खेलमा २ सय २६ रनले जितको थियो ।

मुलपानी मैदानमा २ सय ६६ रनको लक्ष्य पछ्याएको हङकङले निर्धारित ५० ओभरमा ९ विकेट गुमाएर १ सय ३५ रन मात्र जोड्न सक्यो ।

हङकङका लागि प्रित मगोकियाले सर्वाधिक ५५ रन जोडे । उनले ८७ बलमा ७ चौका प्रहार गरे । कप्तान शिब माथुरले १९ तथा अब्दुल समादले २३ रन जोड्नु बाहेक अन्य ब्याटरले दोहोरो अंकमा रन बनाउन सकेनन् ।

नेपालका कप्तान अभिषेक तिवारी र अर्फुद्धिन खानले समान २ तथा राजेश बोहोरा, दिपक सेरला र सन्तोष यादवले समान १ विकेट लिए ।

त्यसअघि टस जितेर ब्याटिङ गरेको नेपाल यु १९ ले ४९.१ ओभरमा अल आउट हुदै २ सय ६५ रनको योगफल तयार गरेको थियो । नेपालका लागि सुर्याशुं कोइराला, सन्तोष यादव तथा कप्तान अभिषेक तिवारीले अर्धशतक बनाए ।

ओपनर सुर्याशुंले सर्वाधिक ६० रन जोडे । उनले ९६ बलमा ८ चौका र १ छक्का प्रहार गरे । कप्तान अभिषेकले ४१ बलमा ४ चौका र २ छक्काको सहयोगमा ५६ रन जोडेका थिए । सन्तोषले ४५ बलमा ६ चौका र १ छक्काको सहयोगमा ५३ रन जोडेका थिए ।

नरेन भट्टले ३६, राजेश बोहोराले ११ तथा सोहेल कुवँरले १३ रन जोड्नु बाहेक अन्य ब्याटरले दोहोरो अंकमा रन जोड्न सकेनन् ।

हङकङ यु १९ का लागि डानिल माप्पा, पर्थ श्रीवास्तव, शयान पुरी र प्रित मगोकियाले समान २ विकेट लिए ।