एजेन्सी – घरेलु टोली न्युजिल्याण्डले श्रीलंकामाथि पहिलो टि ट्वान्टी आईमा रोमाञ्चक जित हासिल गरेको छ ।

न्युजिल्याण्डले शनिवार श्रीलंकालाई ८ रनले हराएको छ । न्युजिल्याण्डले ३ टि ट्वान्टी आई सिरिजमा १-० को अग्रता लिएको छ ।

१ सय ७३ रनको लक्ष्य पछ्याएको श्रीलंकाले निर्धारित २० ओभरमा ८ विकेट गुमाएर १ सय ६४ रन मात्र जोड्न सक्यो ।

श्रीलंकाका लागि ओपनर पथुम निशंकाले सर्वाधिक ९० रन जोडे । उनले ६० बलमा ७ चौका र ३ छक्का प्रहार गरे ।

पहिलो विकेटका लागि निशंका र अर्का ओपनर कुशल मेन्डिसले १३.३ ओभरमा १ सय २१ रनको साझेदारी गरेका थिए । मेन्डिसले ३६ बलमा ६ चौका र १ छक्काको सहयोगमा ४६ रन जोडे ।

श्रीलंकाले पहिलो विकेट गुमाउँदा जितका लागि ३९ बलमा ५२ रनको आवश्यकता थियो । तर, कुनै पनि खेलाडीले दोहोरो अंकमा रन नजोड्दै नियमित विकेट गुमाए पछि श्रीलंका पराजित हुन पुग्यो ।

भानुका राजापाक्षे ८, वानिन्दु हसरंगा ५ तथा कप्तान चरिथ अंसलका ३ रनमा आउट भए । १ सय २१ रनमा पहिलो विकेट गुमाएको श्रीलंकाले ४३ रन थप्दा सात विकेट गुमायो ।

न्युजिल्याण्डका लागि प्लेयर अफ द म्याच समेत भएका जोकब डफीले ३ तथा जाक्रि फल्स र म्याट हेनरीले समान २ विकेट लिए । अन्तिम ओभरमा श्रीलंकालाई जितका लागि १४ रन आवश्यक परेकोमा फुल्सले २ विकृटका साथ ५ रन मात्र खर्चिएका थिए ।

त्यसअघि टस हारेर पहिले ब्याटिङको निम्तो पाएको घरेलु टोलीले निर्धारित २० ओभरमा ८ विकेट गुमाएर १ सय ७२ रनको योगफल तयार गरेको थियो ।

माइकल ब्रेसवेल र ड्यारिल मिचेलले अर्धशतक बनाए । मिचेलले सर्वाधिक ६२ रन जोडे । उनले ४२ बलमा ४ चौका र २ छक्का प्रहार गरे।

छैठौं विकेटका लागि मिचेल र ब्रेसवेलले १ सय ५ रनको शतकीय साझेदारी गरेका थिए । ब्रेसवेलले ३३ बलमा ४ चौका र ४ छक्काको सहयोगमा ५९ रन जोडेका थिए । मार्क च्याम्पम्यान १५, ओपनर टिम रोबिसन ११ तथा ग्लेन फिलिप्स र रचिन रविन्द्र समान ८ रनमा आउट भए ।

श्रीलंकाका विनुरा फर्नान्डो, महेश थिक्सेना र वानिन्दु हसरंगाले समान २ तथा मथिशा पथिरानाले १ विकेट आफ्नो नाममा गरे । दोस्रो टि ट्वान्टी आई खेल सोमवार हुनेछ ।