काठमाडौं(हाम्रो खेलकुद) – विभागीय टोली त्रिभुवन आर्मी क्लब र बागमती प्रदेशले जय ट्रफी मेन्स एलिट कपमा फेरि बराबरी खेलेका छन् ।

बागमतीको ब्याटिङ जारी रहँदा अन्तिम दिन बिहीबारको खेल समाप्ति भएसँगै खेल बराबरीमा सकिएको हो । २ सय ४ रनको लक्ष्य पछ्याएको बागमतीले ८० रनमा ५ विकेट गुमाएको अवस्थामा दिनको समाप्ति भएसँगै दुवै टोलीले बोनस बाहेकको समान १ अंक पाएका हुन् ।

बागमतीका लागि शुभ कसांकारले सर्वाधिक ३३ रन जोडे । रित गौतम १६ तथा नन्दन यादव १३ रनमा आउट भए । आर्मीका आकाश चन्द र पवन कार्कीले समान २ तथा कुशल मल्लले १ विकेट लिए ।

आर्मीले पहिलो इनिङ्समा ७६ रनको अग्रता लिएको थियो । दोस्रो इनिङ्समा १ सय २७ रन थप्दै आर्मीले इनिङ्स समाप्तिको घोषणा गरेको थियो । दोस्रो इनिङ्समा आर्मीले २ सय ३ रनको अग्रता लिएपछि बागमतीले २ सय ४ रनको लक्ष्य पाएको थियो ।

दोस्रो इनिङ्समा आर्मीका लागि तृत राज दासले सर्वाधिक २८ रन जोडे । कप्तान विनोद भण्डारी २७ तथा इम्रान शेख १५ रनमा आउट हुँदा कुशल मल्ल २१ रनमा नट आउट रहे ।

टस हारेर पहिले ब्याटिङको निम्तो पाएको आर्मीले पहिलो इनिङ्समा निर्धारित ६० ओभरमा ५ विकेट गुमाएर २ सय ७६ रन बनाएको थियो ।

आर्मीका लागि ओपनर इमरान शेखले सर्वाधिक ७२ रन जोडे । उनले १ सय ४ बलमा ११ चौका प्रहार गरेका थिए । पहिलो विकेटका लागि इमरानले अर्का ओपनर तृत राज दाससँग मिलेर १ सय ३ रनको शतकीय साझेदारी गरेका थिए । तृत राजले ७८ बलमा ४४ रन बनाएका थिए ।

बसिर ६४ बलमा ५३ रन बनाउँदै नट आउट रहे । बसिरले कुशल मल्लसँग मिलेर छैठौं विकेटका लागि नट आउट ६९ रनको साझेदारी गरे । कुशल ४३ बलमा ३५ रनमा नट आउट रहे । भीम सार्की ५१ बलमा ३२ रन बनाउँदै आउट भए ।

बागमतीका लागि विपिन आचार्यले ३ तथा कप्तान सन्दीप लामिछानेले २ विकेट लिए । सन्दीप प्रतियोगितामा १ सय रन खर्चिने पहिलो बलर बने । उनले २२ ओभरमा १ सय ३ रन खर्चिए ।

बागमतीले पहिलो इनिङमा ९ विकेटको क्षतिमा २ सय रन जोडेर इनिङ्स समाप्तिको घोषणा गरेकक थियो। बागमतीका लागि नन्दन यादवले सर्वाधिक ५१ रन जोडे । शुभ कसांकार ३४, उत्तम थापा मगर २८, रित गौतम २१, विपिन आचार्य २० तथा प्रतिस जिसी र आशुतोष घिरैया समान ११ रनमा आउट भए ।

आर्मीका आकाश चन्दले ३ तथा साहब आलम, पवन कार्की र सोमपाल कामीको समान २ विकेट लिए । आर्मीले बोनसमा १५ अंक पाएको छ । यसका साथै दुई खेलमा ३० अंकका साथ आर्मी दोस्रो स्थानमा छ ।

बागमतीले भने बोनसमा १२ अंक पाएको छ । दुई खेलमा २८ अंकका साथ बागमती तालिकाको तेस्रो स्थानमा छ । दुवै टोलीले पहिलो खेल पनि बराबरी खेलेका थिए ।

प्रतियोगिताको बाँकी खेल तालिका –

जनवरी ११ देखि १२ सम्म

नेपाल पुलिस क्लबविरुद्ध बागमती प्रदेश – जनकपुर
त्रिभुवन आर्मी क्लबविरुद्ध मधेश प्रदेश – वीरगंज

जनवरी १४ देखि १६ सम्म फाइनल खेल – वीरगंज