काठमाडौं(हाम्रो खेलकुद) – लुम्बिनी प्रदेशले प्रधानमन्त्री कप महिला टि ट्वान्टी राष्ट्रिय प्रतियोगितामा पहिलो जित हासिल गरेको छ ।

कैलाली धनगढीको फाप्ला क्रिकेट मैदानमा शुक्रवार भएको दोस्रो खेलमा लुम्बिनीले गण्डकी प्रदेशलाई ६ विकेटले हराएको हो ।

जितसँगै लुम्बिनीले सुपर फोरमा पुग्ने झिनो सम्भावना कायमै राखेको छ । तर त्यसका लागि आफूले जितेर मात्र पुग्दैन अरु खेलको नतिजा कुर्नुपर्ने हुन्छ।

९८ रनको लक्ष्य लुम्बिनीले १६.२ ओभरमा ४ विकेट गुमाएर पूरा गर्यो । लुम्बिनीकी सरस्वती पुनले नटआउट रहँदै सर्वाधिक ३१ रन जोडिन् । उनले २६ बलमा ५ चौका प्रहार गरिन् ।

ओपनर रञ्जु श्रेष्ठले २० र एन्जी पाठकले १८ रन बनाइन् । गण्डकीकी अपेक्षा बुढाथोकीले २ विकेट लिइन् ।

त्यसअघि टस जितेर पहिले ब्याटिङ रोजेको गण्डकीले २० ओभरमा ४ विकेट गुमाएर ९७ रन जोडेको थियो ।

गण्डकीकी सलिना सेनले नट आउट रहँदै सर्वाधिक ३३ र रेखा तामाङले २५ रन जोडेकी थिइन् । लुम्बिनीकी मनिषा रानाले २ र मधु डिसीले १ विकेट लिइन् ।

प्रतियोगितामा २ विभागीय र ७ प्रदेशको टोलीले प्रतिस्पर्धा गरिरहेका छन् । सहभागी टोलीलाई दुई समूहमा विभाजन गरिएको छ ।

समूह ए मा लुम्बिनी , गण्डकी , कर्णाली , एपिएफ क्लब र सुदूरपश्चिम छन् । समूह बी मा कोशी , मधेश , बागमती त्रिभुवन आर्मी क्लब छन् । दुई समूहबाट शीर्ष दुई टोली सुपर फोरमा प्रवेश गर्ने छन् ।

सुपर फोरमा एक समूहको टोलीले अर्को समूहको टोलीसँग खेल्नेछन् । सुपर फोरमा शीर्ष दुईमा रहने टोलीबिच फाइनल हुनेछ । दुवै समूहका तेस्रो स्थानमा रहने टोलीहरुले पाँचौ र छैटौं स्थानका लागि खेल्नेछन् ।