हिमाल खरेल, बिर्तामोड

झापाको बुद्धशान्तिमा जारी दोस्रो झापा जिल्ला अन्तरपालिका टि ट्वान्टी पुरुष क्रिकेट प्रतियोगिताको उद्घाटन खेलमा भद्रपुर नगरपालिका विजयी हुँदै क्वार्टर फाइनलमा प्रवेश गरेको छ ।

भद्रपुरले दमक नगरपालिकालाई १० विकेटले हराएको हो । प्रतिकुल मौसमका कारण आज २० ओभरको खेललाई छोट्याएर १० ओभरमा झारिएको थियो ।

टस हारेर पहिलो ब्याटिङको निम्तो पाएको दमकले १० ओभरमा ६ विकेट गुमाउँदै भद्रपुर लाई ७५ रनको लक्ष्य दिएको थियो ।

दमकका लागि संगम बुढाथोकीले १६ बलमा २५ रन जोडे । सचिन श्रेष्ठले १८ बल खेल्दै २० रन बनाए । अन्य खेलाडीले खासै राम्रो खेल्न सकेनन् ।

भद्रपुरका प्रवेश कामतीले २ ओभर बलिङ गर्दै ९ रन दिएर २ विकेट लिए ।

त्यस्तै, जवाफी ब्याटिङ गरेको भद्रपुरले ४. ४ ओभरमा बिना विकेटको क्षतिमा ७५ रनको लक्ष्य प्राप्त गरेको थियो । भद्रपुरका लागि निखिल पौडेलले १९ बलको सामना गर्दै विष्फोटक ५४ रन बनाए।

उत्कृष्ट ब्याटिङ प्रदर्शन गरेका भद्रपुरका निखिल प्लेयर अफ द म्याच भए र उनले ३ हजार रुपैयाँ ।

भोलि बिर्तामोड नगरपालिकाले कमल गाउँपालिकाको सामना गर्नेछ भने कनकाई नगरपालिकाले बाह्रदशी गाउँपालिकाविरुद्ध खेल्नेछ ।

बुद्धशान्ति–३ स्थित पेट्रोल पम्पछेउको खुला मैदानमा जारी प्रतियोगितामा झापाका १५ वटै पालिका सहभागी रहेको आयोजक बर्खा प्रतिष्ठानका अध्यक्ष मदन प्रसाईंले जानकारी दिए ।

प्रतियोगिताको विजेताले १ लाख ५० हजार र दोस्रो टोलीले ७५ हजार रुपैयाँ प्राप्त गर्ने अध्यक्ष प्रसाईंले बताए ।