हिमाल खरेल, बिर्तामोड

साविक विजेता बिर्तामोड नगरपालिका र कनकाई नगरपालिका बुद्धशान्तिमा जारी दोस्रो झापा जिल्ला अन्तरपालिका टि ट्वान्टी पुरुष क्रिकेट प्रतियोगिताको क्वार्टरफाइनलमा प्रवेश गरेका छन् ।

आज भएको पहिलो खेलमा बिर्तामोड नगरपालिकाले कमल गाउँपालिकालाई ८७ रनले पराजित गर्‍यो ।
टस जितेर पहिले ब्याटिङ गरेको बिर्तामोड नगरपालिकाले निर्धारित २० ओभरमा ५ विकेट गुमाउँदै २ सय १४ रन बनाएको थियो ।

२ सय १५ रनको लक्ष्य पछ्याएको कमल गाउँपालिकाले २० ओभर खेल्दै ९ विकेट गुमाएर १ सय २७ रनमा सीमित रह्यो । बिर्तामोडका लागि २७ बलमा ५४ रन बनाएका आदर्श सरिया प्लेयर अफ द म्याच घोषित भए ।

त्यस्तै, दोस्रो खेलमा बाह्रदशी गाउँपालिकाविरुद्ध कनकाई नगरपालिकाले ३४ रनले जित दर्ता गरेको छ । पहिले ब्याटिङ गरेको कनकाई नगरपालिकाले निर्धारित २० ओभरमा ९ विकेट गुमाउँदै १ सय ८२ रन बनाएको थियो ।

१ सय ८३ रनको लक्ष्य पछ्याएको बाह्रदशी गाउँपालिकाले ८ विकेट गुमाउँदै १४८ रन मात्र बनाउन सक्यो ।

कनकाईको जितमा ब्याटिङमा २६ रन बनाउनुका साथै बलिङमा २ विकेट लिएका अनिश न्यौपाने प्लेयर अफ द म्याच घोषित भए ।

प्रतियोगिता आइतवार पहिलो खेल झापा गाउँपालिका र शिवसताक्षी नगरपालिकाबीच तथा दोस्रो खेल मेचीनगर नगरपालिका र हल्दिबारी गाउँपालिकाबिच हुने आयोजक वर्षा स्मृति प्रतिष्ठानका अध्यक्ष मदन प्रसाईंले जानकारी दिए ।

प्रतियोगिताको विजेताले नगद १ लाख ५० हजार रुपैयाँ, मेडल, ट्रफी र प्रमाणपत्र प्राप्त गर्नेछ भने उपविजेताले नगद ७५ हजार रुपैयाँ, मेडल, ट्रफी र प्रमाणपत्र प्राप्त गर्ने प्रतियोगिता अध्यक्ष प्रसाईंले बताए ।