काठमाडौं(हाम्रो खेलकुद) – महावीर ए.एल.एस सेन्टर र ग्रेट हिमालय क्रिकेट एकेडेमीले प्रधानमन्त्री कप पुरुष क्रिकेट काठमाडौं जिल्ला छनोटमा विजयी सुरुवात गरेका छन् ।

मुलपानी क्रिकेट मैदानमा महावीरले ओएसिस क्रिकेट एकेडेमी र ग्रेट हिमालयले हिमालयन क्रिकेट एकेडेमी ‘ए’ लाई पराजित गरे ।

बिहीवारको दोस्रो खेलमा महावीरले ओएसिसविरुद्ध १ सय रनको फराकिलो जित दर्ता गर्यो । २ सय ८ रनको लक्ष्य पछ्याएको ओएसिसले निर्धारित २० ओभरमा ६ विकेट गुमाउँदै १ सय ७ रन मात्रै बनाउन सक्यो ।

ओएसिसका लागि सुवोध ढुंगानाले ६२ बलमा सर्वाधिक ६२ रनको जोडे । रोशन पुलामी मगर १९ र ओबामा श्रेष्ठले १४ रनमा आउट भए । महावीरका लागि सोनु देवकोटाले २ तथा राजेश कर्ण र एकेन्द्र बुढाले समान १ विकेट लिए ।

त्यसअघि टस जितेर ब्याटिङ रोजेको महावीरले निर्धारित २० ओभरमा ३ विकेट गुमाउँदै २ सय ७ रनको योगफल तयार पारेको थियो । महावीरका लागि प्लेयर अफ द म्याच समेत रहेका सोनुले सर्वाधिक ७९ रनको योगदान गरे ।

रोविन जोशीले नट आउट ७२ जोड्दा उत्तम थापामगरले ३५ रनमा आउट भए । ओएसिसका लागि निर्जल श्रेष्ठ, अविजित सुनार र निश्चल श्रेष्ठले समान १ विकेट लिए ।

आजै भएको पहिलो खेलमा ग्रेट हिमालयले हिमालयन ‘ए’ विरुद्ध ७७ रनको जित निकाल्यो । १ सय ६१ रनको लक्ष्य पछ्याएको हिमालयन १९ ओभरमा ८३ रन बनाउँदै अल आउट भयो ।

हिमालयनका लागि दीपक बोहराले सर्वाधिक ४९ रन जोडे । हिमालयनका अन्य ब्याटरले दोहोरो अंकमा रन जोड्न सकेनन् ।

ग्रेट हिमालयका लागि दर्शिल विष्ट र प्रकाश विष्टले समान २ तथा इशान पाण्डेले १ विकेट लिए ।

त्यसअघि टस जितेर ब्याटिङ रोजेको ग्रेट हिमालयले निर्धारित २० ओभरमा ७ विकेट गुमाउँदै १ सय ६० रनको योगफल तयार पारेको थियो । ग्रेट हिमालयका लागि इशान पाण्डेले सर्वाधिक ७१ रनको योगदान गरे ।

यसैगरी दीपक महतो ३८ रनमा नट आउट रहँदा राजु सहानी २३ रनमा आउट भए । हिमालयनका लागि प्रमिश पोख्रेलले ३, सुलभ न्यौपानेले २ तथा दीनेश विष्टले १ विकेट लिए ।