काठमाडौं (हाम्रो खेलकुद)- कर्णाली याक्स स्पोट्स प्रा.लीले नेपाल प्रिमियर लिग (एनपिएल)को दोस्रो संस्करणका लागि नयाँ जर्सी सार्वजनिक गरेको छ ।

कर्णाली याक्सका निर्देशक गृहेन्द्र घिमिरेले मंसिरमा हुने एनपिएलको लागि कर्णाली याक्सले लगाउने जर्सी सार्वजनिक भएको र चाँडै समर्थकमाझ पुर्याउने योजना रहेको बताएका छन् ।

कर्णाली याक्सको जर्सीमा आकाशे र पहेँलो रंग समावेश गरिएको छ । जसले कर्णाली प्रदेशको भौगोलिक र साँस्कृतिक महत्व पनि राख्ने बताइएको छ ।

दोस्रो संस्करणको लागि कर्णाली याक्सले आफ्नो तयारी तीव्र बनाएको छ । कर्णालीले ट्यालेन्ट हन्ट कात्तिक १७ गते (नोभेम्बर ३ मा) गर्दैछ ।

पहिलो संस्करणमा कर्णाली याक्सले दोस्रो क्वालिफायरसम्मको यात्रा तय गरेको थियो ।
दोस्रो संस्करणमा पनि कर्णालीले ज्ञानेन्द्र मल्ललाई नै प्रशिक्षकमा र राजु बस्न्यातलाई कन्सल्ट्यान्ट प्रशिक्षकमा निरन्तरता दिएको छ।

यस्तै, कर्णालीले मार्की सोमपाल कामीसँगै गुलशन झा, नन्दन यादव, विपिनप्रसाद शर्मा, दीपेन्द्र रावत, अर्जुन घर्ती र युनिससिंह ठकुरीलाई रिटेन गरेको छ । विपिनसँगै दीपेन्द्र, अर्जुन र युनिससिंह कर्णाली प्रदेशकै खेलाडी हुन् ।

त्यस्तै, क्लबले पहिलो विदेशी खेलाडीको रुपमा स्कटल्यान्डका मार्क वाटलाई अनुबन्ध गरेको छ । २९ वर्षीय वाटले स्कटल्यान्डको लागि टि ट्वान्टी आईमा ७७ खेल खेल्दा ८९ विकेट लिएका छन् । त्यस्तै, २ सय ९४ रन जोडेका छन् । उनले ओडिआईमा ८२ खेल खेल्दा एक सय १० विकेट लिएका छन् ।