काठमाडौं (हाम्रो खेलकुद)- कर्णाली याक्स स्पोट्स प्रा.लिले नेदरल्याण्ड्सका ओपनिङ ब्याटर म्याक्स्वेल प्याट्रिक ओ डाउडलाई अनुबन्ध गरेको छ ।

कर्णाली याक्सका निर्देशक गृहेन्द्र घिमिरेले नेपाल प्रिमियर लिग (एनपिएल) को दोस्रो सिजनका लागि डाउडलाई अनुबन्ध गरेको जानकारी दिए ।

यसअघि कर्णाली याक्सले स्कटल्यान्डका स्पिनर मार्क रोबर्ट जेम्स वाट र अस्ट्रेलियाका विलियम बोसिस्टोलाई अनुबन्ध गरिसकेको छ।

‘हामीले ओपनिङ ब्याटिङ जोडी मजबुद बनाउने योजनासहित एसोसिएट राष्ट्र नेदरल्यान्ड्सका म्याक्सलाई अनुबन्ध गरेका हौं,’ निर्देशक घिमिरेले भने, ‘उनी त्रिविको मैदान र नेपाली खेलाडीसँग राम्रोसँग परिचित छन् । त्यसले हामीलाई पक्कै फाइदा पुग्नेछ ।’

कर्णालीले बासिष्टोसँग सम्झौता नवीकरण गरेको‌ थियो। वाट र डाउडले भने पहिलो पटक एनपिएल खेल्नेछन्।
३१ वर्षीय डाउडले नेदरल्यान्ड्सबाट ८७ टि ट्वान्टी आई खेल खेलिसकेका छन् । जसमा १ शतक‌ र १६ अधशतकसहित उनले २ हजार ३ सय ९ रन बनाएका छन् ।

कीर्तिपुरको मैदानमा उनले मलेसियाविरुद्ध ७३ बलमा करियरकै अविजित सर्वाधिक १ सय ३३ रन बनाएका थिए । उनले नेदरल्यान्ड्सको लागि ६५ ओडिआई खेलमा २ हजार १ सय ५३ रन बनाइसकेका छन् ।

कर्णालीले दोस्रो सिजनको एनपिएलको लागि ट्यालेन्ट हन्ट ५ नोभेम्बरमा आयोजना गर्दैछ । पहिलो संस्करणमा कर्णाली याक्सले दोस्रो क्वालिफायर पुगेको थियो ।

कर्णालीले ज्ञानेन्द्र मल्ललाई नै प्रशिक्षकमा निरन्तरता दिएको छ । टोलीको कन्सल्ट्यान्ट प्रशिक्षकमा राजु बस्नेत छन् ।

कर्णाली याक्सले मार्की सोमपाल कामी हुन् । कर्णालीसहित ८ टोलीले मंसिर १ गते सुरु हुने एनपिएलमा प्रतिस्पर्धा गर्नेछन्।