काठमाडौं (हाम्रो खेलकुद)- सुदूरपश्चिम रोयल्सले आधिकारिक एपरेल (पोशाक) पार्टनरको रुपमा डिआरसँग सम्झौता गरेको छ ।

नेपाल प्रिमियर लिग (एनपीएल) टोली सुदूरपश्चिमका प्रमुख कार्यकारी अधिकृत (सिइओ) प्रकाश खड्का र नेपाली कपडा ब्रान्ड डिआरजेका मालिक डिल्ली राज जोशीले सम्झौता पत्रमा हस्ताक्षर गरे ।

सम्झौताअनुसार डिआरजेले सुदूरपश्चिम रोयल्सका लागि जर्सी उपलब्ध गराउने छ। सुदूरपश्चिम रोयल्सका सिइओ खड्काले डिआरजेले उच्च गुणस्तरका खेल पोशाकले खेलाडीको प्रदर्शन र आत्मविश्वासमा सकारात्मक प्रभाव पार्ने विश्वास व्यक्त गरे ।

‘डीआरजे पछिल्लो समय निकै लोकप्रिय र चर्चित नेपाली कपडा ब्रान्ड हो । खेलाडी र टिम दुवैका लागि उत्कृष्ट र गुणस्तरका खेल पोशाक चाहिन्छ,’ सिइओ खड्काले भने,‘त्यसैले हामीले डिआरजेसँग सहकार्य गरेका छौं । यसले सुदूरपश्चिमको पोशाकमा उच्च स्तरको गुणस्तर झल्काउने छ ।’

डिआरजेका जोशीले सुदूरपश्चिमसँग जोडिन पाउनु गौरवको विषय भएको बताए । उनले भने ‘सुदूरपश्चिमसँग सहकार्य गर्न पाउँदा आफ्नै माटोसँग जोडिएको अनुभूति भएको छ । पछिल्लो सिजन जस्तै उत्कृष्ट प्रदर्शन यो सिजन उपाधि जित्नेमा विश्वस्त छु।’

सुदूरपश्चिम एनपिएलको पहिलो संस्करणमा दोस्रो भएको थियो। सुदूरपश्चिमसहित ८ टोलीले मंसिर १ देखि सुरु हुने एनपिएलको दोस्रो संस्करणमा प्रतिस्पर्धा गर्नेछन्। राष्ट्रिय टोलीका उप कप्तान दीपेन्द्र सिंह ऐरी सुदूरपश्चिमका मार्की खेलाडी हुन्।