काठमाडौं (हाम्रो खेलकुद)- नामिबियाका कप्तान जेर्हाड इरसमसले काठमान्डु गोर्खाजबाट लगातार दोस्रो वर्ष नेपाल प्रिमियर लिग (एनपिएल) खेल्ने भएका छन् ।

काठमाडौं स्पोर्टस डेभलपमेन्ट भेन्चर्स प्रालीको स्वामित्वमा रहेको काठमान्डु गोर्खाजले दोस्रो विदेशी खेलाडीको रुपमा इरसमसलाई भित्राएको हो ।

उनी सन् २०१९ देखि लगातार नामिबियाको नेतृत्व गर्दै आएका छन् । इरसमसले २०२३ र २०२४ मा आईसिसी पुरुष एसोसिएट क्रिकेटर अफ द इयर पुरस्कार जितेका थिए ।

वर्ष २०२४ को पुरुष एसोसिएट क्रिकेटर अफ द इयर हुने क्रममा इरसमसले २०२३ मा कीर्तिपुरमा नेपालविरुद्धै विश्व क्रिकेट लिग २ का खेलमा २८ रन खर्चेर ५ विकेट लिएका थिए। जुन उनको एकदिवसीय अन्तर्राष्ट्रियमा उत्कृष्ट बलिङ प्रदर्शन पनि हो ।

त्यस्तै उनले सो वर्ष ४ अर्धशतक पनि प्रहार गरेका थिए, जसमा वेस्ट इन्डिजमा भएको टि ट्वान्टी विश्वकपमा स्कटल्यान्डविरुद्ध ३१ बलमा ५२ रन बनाएका थिए । इरसमसले वर्ष २०२४ मा टि ट्वान्टी आईमा कुल १८ विकेट लिएका थिए ।

काठमान्डु गोर्खाजको टोलीसँग उनी यसअघि नै परिचित छन् । एनपिएलको पहिलो संस्करणमा उनले काठमान्डु गोर्खाजको उपकप्तानको भुमिकामा सानदार प्रदर्शन गरेका थिए । उनले ७ खेलमा १ सय ३७ माथिको स्ट्राइक रेटमा १ सय १० रन बनाउनुका साथै ११.९० को औषतमा ११ विकेट लिएका थिए ।

‘गत सिजन इरसमसले काठमान्डु गोर्खाजबाट उत्कृष्ट खेलेका थिए, यो वर्ष उनले अझ राम्रो खेल्ने छ भन्ने विश्वास लिएका छौं । उ राम्रो लिडर पनि हो, त्यसले पनि हाम्रो टिमलाई फाइदा पुगेको थियो । मैदान भित्र खेलाडीलाई उसले निकै एक्टिभ बनाएर राख्छ ।
इरसमस एसोसिएट क्रिकेटको उत्कृष्ट अलराउन्डर र उत्कृष्ट फिल्डर हुन्, उनी जस्ता खेलाडीलाई राखेर टिम बनाउदा प्रभावकारी हुने अपेक्षा राखेको छु,’ काठमान्डु गोर्खाजका प्रशिक्षक वसन्त शाहीले भने ।

३० वर्षे इरसमसले नामिबियाबाट ६३ खेलमा ३८.२१ को औषतमा २ शतक र १७ अर्धशतकका साथ २१७८ एकदिवसीय अन्तर्राष्ट्रिय रन र ७७ टि ट्वान्टी आईमा १ शतक र १३ अर्धशतकका साथ १२४ माथिको स्ट्राइक रेटमा १ हजार ८ सय ३३ रन बनाइसकेका छन् ।

उनले पछिल्लो तीन सिजन गुजरात जायन्ट्सबाट यूएईको आईएल टि ट्वान्टी पनि खेल्दै आएका छन् ।
काठमान्डु गोर्खाजले दोस्रो एनपिएलका लागि भित्राइएका उनी दोस्रो विदेशी खेलाडी हुन् ।

यसअघि नै दक्षिण अफ्रिकामा जन्मिएका र हाल इंग्ल्यान्डको घरेलु क्रिकेटमा खेल्दै आएका रिकार्डो भास्कोनेसेलोसलाई लिइसकेको छ । राष्ट्रिय टोलीका सदस्य करण केसी गोर्खाजका मार्की खेलाडी हुन्।

एनपिएको‌ दोस्रो सिजन मंसिर १ गते सुरु हुनेछ।