भुपेन्द्र जि.सी.

आइसिसी विश्वकप लिग टु मा नेपाल आफ्नो १९ औं खेलमा शनिवार अमेरिकासँग ४ विकेटले हार्यो । नेपालले सुरुवाती २ खेलको तुलनामा सुधारिएको ब्याटिङ प्रदर्शन गरेपनि जित निकाल्न सकेन ।

युएई भ्रमणमा लगातार ३ हार ब्यहोरेपछि नेपालको शीर्ष ४ मा रहँदै सोझै विश्वकप छनोट खेल्न र ओडिआई मान्यता निरन्तरता बचाउन पनि कठिन पर्नसक्ने देखिएको छ ।

आइसिसी एकेडेमी दुबईमा आज टस हारेर पहिला ब्याटिङको निम्तो पाएको नेपाल १ बल अगाडि २ सय ७१ रनमा अल आउट भएको थियो । जित्नलाई २ सय ७२ रनको लक्ष्य पछ्याएको अमेरिकाले ६ बल अगाडि नै ६ विकेट गुमाउँदै पूरा गर्यो ।

अमेरिका साइतेजा मल्ला ७५ र मिलिन्द कुमारले ७० रनको विजयी इनिङ खेले । प्रमुख बलर सोमपाल कामीलाई युएईविरुद्धको खेलबाट बेन्चमा राखेर मैदान उत्र्रेको नेपालले अमेरिकाविरुद्ध पनि राम्रो बलिङ गर्न सकेन । नेपालले अमेरिकासँग हार्नुको प्रमुख ५ कारण यस प्रकार छन् ।

५. पाएको सुरुवातलाई ब्याटरले ठूलो इनिङमा बदल्न नसक्नु

कुनैपनि ब्याटरलाई क्रिजमा सुरुवातमा रन जोड्न मुश्किल पर्दछ ।  सुरुवातमा रन जोड्ने ब्याटरले नै ठूलो इनिङ खेल्न प्रयास गर्नुपर्छ । आउने ब्याटरबाट रन बन्ने नबन्ने भर हुँदैन । ओपनर आसिफ शेखलाई २ रनमै गुमाएपनि कुशल भुर्तेल र भीम सार्कीले ८६ रनको साझेदारी गरेपछि नेपाल १९ ओभरमा ८८-१ को अवस्थामा थियो ।

भीम र कुशल मध्यले एकले इनिङलाई लगेर अघि बढेको खण्डमा ३ सय रनको योगफल कटाउने माहोल नेपालले बनाएको थियो । तर कुशल र भीम १३ रनको अन्तरमा आउट भएपछि नेपाल ८८-१ बाट १०१-३ को अवस्थामा पुग्यो ।

आरिफ शेख २ रनमै आउट भएपछि जसको कारण क्रिजमा दुबै नयाँ ब्याटर रोहित पौडेल र दीपेन्द्रसिंह ऐरीलाई केही समय साझेदारी बनाउन प्रयास गरे । पाँचौ विकेटलाई रोहित र दीपेन्द्रले ८९ रनको साझेदारी गर्दै नेपाललाई फेरि ३ सय माथिको योगफलको सम्भावना देखाए । रोहितपछि गुल्शन झा २ रनमै आउट भएपछि नेपालले विशाल योगफलको सम्भाावना गुमायो ।

मध्यक्रमका ब्याटर दीपेन्द्रले ६७ बलमा २ चौका र ३ छक्कासहित सर्वाधिक ७५ रन बनाए । कुशल ६५ बलमा ४७, भीम ४३ र रोहित ३६ रनमा आउट भए । पाएको राम्रो सुरुवातको सदुपयोग ब्याटरले गर्न नसक्नु नै नेपालको हारको कारण बन्यो ।

४. पावर प्लेमा विकेटविहीन बन्नु

ओडिआईमा २ सय ७२ रन प्रतिस्पर्धात्मक लक्ष्य मानिन्छ । विपक्षीलाई दबाबमा राख्न र टोलीको आत्माविश्वास बढाउन सुरुवाती १० ओभरमा नेपाललाई १/२ विकेट आवश्यक थियो । तर अमेरिकाले पावर प्लेमा कुनैविकेट नगुमाई ५३ रन जोड्यो । जसको कारण मध्यक्रमका ब्याटर विना दबाब खेल्न पाउदा लक्ष्य पछ्याउन सहज भयो ।

३. साइतेजा र मिलिन्दको साझेदारी तोड्न नसक्नु

सुरुवात कमजोर गरेपनि नेपाल खेलमा फर्किदै अमेरिकालाई २०.५ ओभरमा ९५-३ को अवस्थामा पुर्याएको थियो । क्रिजमा साइतेजा १७ र मिलिन्द शून्यबाट खेल्दा अमेरिकालाई २९.१ ओभरमा १ सय ७७ रन बनाउनु पर्ने थियो ।

त्यसपछि ब्याटिङमा आउन अलराउण्डर सञ्जयकृष्ण मुर्ती, हरमित सिंह र शुभम रान्जानी थिए । त्यसैले साइतेजा र मिलिन्दको साझेदारी नै खेलमा निर्णायक हुने निश्चित बन्यो । यी दुई मध्य एकलाई समयमै आउट गर्न सकेको भए नेपालले खेलमा पकड जमाउन सक्थ्यो ।

तर चौथो विकेटलाई यी दुई ब्याटरले १ सय २३ रनको साझेदारी गर्दै जिततर्फ अघि बढाए । सन्दीप लामिछानेले ४३ औं ओभरको पाँचौं बलमा मिलिन्दलाई क्याच आउट गर्दा अमेरिका जित पक्कापक्की जस्तै बनेको थियो । त्यसपछि हरमित, सञ्जय र शुभमले अन्त्य राम्रो गरे । साइतेजा र मिलिन्दको साझेदारी तोड्न नसक्नु नै नेपालको हारको कारण बन्यो ।

२. कमजोर फिल्डिङ

नेपालले साइतेजा र मिलिन्द कुमारको साझेदोरी तोड्न बलरले प्रयास नगरेका भने होइनन् । तर फिल्डिरबाट साथ रहन सकेन । स्पिनर सन्दीपको २५ औं ओभरको चौथो बलमा साइतेजाको क्याच कुशलले व्यक्तिगत २१ रनमा छाड्दै महत्वपूर्ण जीवनदान दिए । लगत्तै अर्को ओभरमा दीपेन्द्रले दिएको थ्रो राम्रोसँग कलेक्ट गरेर विकेटकिपर आसिफ शेखले साइतेजालाई नै रन आउट गर्ने अवसर गुमाए । दीपेन्द्र डाइरेक्ट थ्रोमा विरलै मिस हुने गर्दछन् ।

सन्दीपको ४० औं ओभरको चौथो बलमा बाउन्ड्री नजिकै गुल्शनले ब्यक्तिगत ५७ रनमा साइतेजालाई अर्को जीवनदान दिए । नेपालका प्रमुख फिल्डर भीम र दीपेन्द्रकै फिल्डिङ आजको खेलमा अपेक्षा भन्दा खराब रह्यो । अमेरिकाविरुद्ध खेलमा कमजोर फिल्डिङ हारको कारण बन्यो ।

१. प्रमुख बलरले सही समयमा विकेटलिन संघर्ष गर्नु

क्रिकेटमा जित्नलाई ब्याटिङ मात्रै होइन, बलिङ र फिल्डिङ पनि त्यतिनै राम्रो हुनुपर्दछ । ब्याटिङमा सुधार गरेपनि अन्य दुई पक्ष कमजोर हुनु हारको कारण बन्यो । नेपालको २ सय ७१ रनको योगफल बलरले बचाउने अपेक्षा गरिएको थियो । प्रमुख बलर सोमपालको स्थानमा नन्दन यादवलाई मौका दिएको थियो ।

प्रमुख बलरमा सन्दीप , करण केसी, नन्दन र ललित राजवंशीलाई खेलाएको थियो । तर कुनैपनि प्रमुख बलरले नेपाललाई आवश्यक परेको समयका विकेट लिन सकेनन् ।

करणले ९ ओभरमा ४६ रन खर्चेर १ विकेट लिए । करणले आफ्नो विकेटको रुपमा ४६ औं ओभरमा साइतेजालाई क्याच आउट गराए । साइतेजा आउट हुँदा अमेरिकालाई २८ बलमा ३८ रन चाहिँदा टोलीको ५ विकेट बाँकी थियो ।

नेपालले खेल लगभग हारी सकेको अवस्थामा करणले आफ्नो पहिलो विकेट लिए । सन्दीपले १० ओभरमा ५३ रन खर्चेर ३ विकेट लिए । सन्दीपले लिएका ३ मध्य २ अन्तिममा मिलिन्द र शुभमको थियो । सन्दीपको पहिलो विकेट ओपनर शयान जहानजिंगरलाई ३७ रनमा आउट गराए ।

नन्दनले १० ओभरमा ५३ रन खर्चेर १ विकेट लिए । नन्दनले कप्तान मोनांक पटेललाई २१ रनमा आउट गरेपछि पुन विकेट लिन सकेनन् ।

ललितले १० ओभरमा ४५ रन खर्चिदा विकेट लिन सकेनन् । प्रमुख बलर नचल्दा अलराउण्डर दीपेन्द्रको प्रदर्शन निकै महत्वपूर्ण हुँदै आएको थियो ।

अमेरिकाविरुद्ध नेपालले दीपेन्द्रलाई ४२ औं ओभरमा उनको पहिलो ओभर दिएको थियो । त्यसैले आजको खेलमा प्रमुख बलरले सही समयमा विकेट लिन नसक्नु नै हारको अर्को कारण बन्यो ।