एजेन्सी – पाकिस्तानले लाहोरमा शनिवार भएको तेस्रो तथा निर्णायक टि ट्वान्टी आईमा दक्षिण अफ्रिकालाई ४ विकेटले पराजित गर्दै सिरिज २-१ ले जितेको छ।

तीव्र गतिका बलर शाहिन शाह अफ्रिदीले ३ विकेट लिए र बाबर आजमले ४७ बलमा ६८ रनको उत्कृष्ट इनिङ्स खेलपछि घरेलु टोलीको जित निकालेको थियो।

अफ्रिदीको बलिङमा दक्षिण अफ्रिका ९ विकेट गुमाउँदै १ सय ३९ रनयो। त्यसपछि पाकिस्तानले १९ ओभरमै ६ विकेट गुमाउँदै लक्ष्य पूरा गर्‍यो।

यसअघि दक्षिण अफ्रिकाले पहिलो खेल रावलपिण्डीमा ५५ रनले जितेको थियो । लाहोरमा भएको दोस्रो खेल पाकिस्तानले ९ विकेटले जितेको थियो।

गद्दाफी रंगशालामा झण्डै ३२ हजार दर्शकबीच बाबरले लगातार ३ चौका प्रहार गर्दै आफ्नो ३७औँ टि ट्वान्टी आई अर्धशतक पूरा गरे। यो उनको १३ इनिङपछि पहिलो अर्धशतक हो।

बाबर र सलमान आघाले तेस्रो विकेटका लागि ७६ रनको साझेदारी गरे। तर बाबर आउट भएपछि पाकिस्तान केही दबाबमा परेको थियो। हसन नवाज र मोहम्मद नवाज छिट्टै आउट भए पनि उस्मान खानले नटआउट ६ रन बनाएर टिमलाई जिताए।

कप्तान सलमानले भने, ‘ पछि परेपछि फर्किएर सिरिज जित्नु ठूलो कुरा हो। सबै खेलाडीले राम्रो खेले।’

दक्षिण अफ्रिकी कप्तान डोनोभन फेरेइराले भने आफ्नो टिमको ब्याटिङ कमजोर भएको बताए। उनले भने, ‘हामीले धेरै विकेट छिट्टै गुमायौं, तर बलरहरूले राम्रो खेले। यो खेल हाम्रो लागि सिकाइको अवसर हो।’

पहिलो ओभरमै शाहिनले क्विन्टन डे कक र लुआन-द्रे प्रेटोरियसलाई शून्यमा आउट गरे। पाँचौं बलमा डिवाल्ड ब्रेभिस बच्न सफल भए र रीझा हेन्ड्रिक्ससँग तेस्रो विकेटका लागि ३८ रन जोडे। ब्रेभिस २१ रनमा आउट भए।

डेब्यु गरेका उस्मान तारिकले २ विकेट लिए। दक्षिण अफ्रिकाका लागि हेन्ड्रिक्सले ३६ बलमा ३४ रन बनाए । बोस्चले नटआउट ३० रन जोडे।