एजेन्सी – भारतले दक्षिण अफ्रिकालाई ५२ रनले पराजित गर्दै पहिलो पटक महिला एकदिवसीय विश्वकपको उपाधि जितेको छ।

नवी मुम्बईमा आइतवार २ सय ९९ रनको लक्ष्य पछ्याउँदै दक्षिण अफ्रिका ४५.३ ओभरमा सबै विकेट गुमाउँदै २ सय ४६ रनमा समेटियो।

दीप्ति शर्माले शानदार बलिङ गर्दै ५ विकेट लिइन् । जसले खेल भारतको पक्षमा निर्णायक बनायो। दक्षिण अफ्रिकाकी कप्तान लौरा वोलवार्ड्टले उत्कृष्ट १ सय १ रन बनाइन्। तर उनी दीप्तिको बलमा आउट भइन्।

त्यसपछि उनले ख्लोए ट्रायन र नाडिन डे क्लर्कलाई पनि आउट गर्दै दक्षिण अफ्रिकाको अन्तिम सम्भावना समाप्त गरिन्।

खेलको सुरुवातमा वोलवार्ड्ट र ताज्मिन ब्रिट्सले राम्रो साझेदारी गरे पनि अमनजोत कौरको सिधा थ्रोमा ३५ बलमा २३ रन बनाएकी ब्रिट्स रनआउट भइन्।

एनेके बोस शून्य रनमै आउट भइन् भने पूर्व कप्तान सुन लुस २५ रनमा सफाली वर्माको बलमा आउट भइन्। सफालीले त्यसपछि मारिजान क्यापलाई पनि ५ बलमा ४ रनमै आउट गरिन्।

त्यसअघि दक्षिण अफ्रिकाले टस जितेर फिल्डिङ रोजेको थियो। पहिले ब्याटिङ गरेको भारतले ५० ओभरमा ७ विकेटको नोक्सानीमा २ सय ९८ रन बनाएको थियो।
सफाली र दीप्तीले अर्धशतक बनाए। सफालीले ८७ र दीप्तिले ५८ रन बनाइन् ।

भारतलाई सफाली र स्मृति मन्धानाले राम्रो सुरुवात दिलाएका थिए। मन्धाना १८औँ ओभरमा ट्रायनको बलमा ४५ रनमा आउट भइन्। सफालीले त्यसै ओभरमा अर्धशतक पूरा गरेकी थिइन् । खाकाको बलमा उनी आउट भइन्।

सेमिफाइनलकी नायिका जेमिमा रोड्रिग्स २४, कप्तान हरमनप्रीत कौर २०, र अमनजोत कौर १२ रनमा आउट भए।
ऋचा घोषले २४ बलमा ३४ रनको छिटो इनिङ्स खेलिन्।
खेल वर्षाका कारण टस ढिलो सुरु भएको थियो ।

भारत र दक्षिण अफ्रिकाले यसअघि महिला ओडिआई क्रिकेटमा ३४ पटक एकअर्कासँग खेलेका छन्। त्यसमध्ये भारतले २० , दक्षिण अफ्रिकाले १३ खेल जितेको छ र १ खेल बराबरीमा टुंगिएको छ।

सेमिफाइनलमा भारतले अष्ट्रेलियालाई र दक्षिण अफ्रिकाले इंग्ल्याण्डलाई पराजित गरेका थिए।