काठमाडौं (हाम्रो खेलकुद)- अमेरिकाले युएईमा जारी आइसिसी क्रिकेट विश्वकप लिग टु अन्तर्गत युएई त्रिकोणात्मक सिरिजमा लगातार चौथो जित निकालेको छ।

आज २ सय ९३ रनको लक्ष्य पछ्याएको युएई लाई ४९ रनमा अलआउट गर्दै अमेरिकाले २ सय ४३ जित हासिल गरेको छ। यो जितले अमेरिका लिग को अंक तालिकाको शीर्ष स्थानमा थप मजबुत भएको छ।

साइतेजा मुक्कमल्ला र मिलिन्द कुमारको कीर्तिमानी साझेदारीमा पहिले ब्याटिङ गरेको अमेरिकाले ३ विकेटको नोक्सानीमा २ सय ९२ रन बनाएको थियो।

त्यसपछि अमेरिकी बलर रुसिल उग्राकर र सौरभ नेत्रभलकरको घातक बलिङमा युएई २२.१ ओभरमा ४९ रनमा अलआउट भएको थियो। युएईका जुनैद सिद्दीकीले १० रन बनाउन बाहेक कुनै पनि ब्याटरले दोहोरो अंकमा रन जोड्न सकेनन्।

रुसिलले ८.१ ओभरमा एक मेडन राख्दै मात्र २२ रन दिएर ५ र सौरभले ८ ओभरमा ४ मेडन राख्दै मात्र ४ रन दिएर ३ विकेट लिए । शुभम रन्जाने र मिलिन्द कुमारले समान १ विकेट हात पारे ।

त्यसअघि दुबई इन्टरनेशनल क्रिकेट स्टेडियममा युएईले टस जितेर फिल्डिङ रोजेको थियो।

पहिले ब्याटिङ गरेको अमेरिकाले ७ ओभरको समाप्तिमा ३ विकेट गुमाउँदै २८ रन बनाएको थियो। त्यसपछि साइतेजा र मिलिन्दले चौथो विकेटका लागि २ सय ६४ रनको नटआउट कीर्तिमानी साझेदारी गरे। दुबैले‌ शतक पूरा गरे।

१ सय ४९ बलमा साइतेजाले १० चौका र ३ छक्का सहयोगमा १ सय ३७ रन बनाए । मिलिन्दले १ सय २५ बलमा ११ चौका र १ छक्कासहित १ सय २३ रन जोडे।  त्यसअघि कप्तान मोनांक पटेल १५ , ओपनर स्मिथ पटेल ५ र सयान जहाजिर २ रनमा आउट भए।

लिग टुको २४ खेल मध्ये १८ जित र ६ मा हार बेहोरेको अमेरिकाको ३६ अंक छ। सिरिजमा अमेरिकाले नेपाल र युएईलाई दुई पटक हराएको छ।

८ टोली सहभागी रहेको लिग टुको तालिकामा नेपाल १२ अंकसहित सातौं र युएई ८ अंकसहित पुछारमा छ। सिरिजको अन्तिम खेलमा बुधबार नेपाल र युएईबिच हुनेछ ।