काठमाडौं (हाम्रो खेलकुद) – हिमालयन एभरेष्ट इन्स्योरेन्स लिमिटेडले नेपाल प्रिमियर लिगको टोली चितवन राइनोजसँग सह-प्रायोजन सम्झौता गरेको छ ।

खेलकुदको प्रवर्द्धन र बीमा सचेतना विस्तार गर्ने उद्देश्यका साथ इन्सोरेन्सले राइनोजसँग सहकार्य गरेको हो । आइतबार एक कार्यक्रममाझ हिमालयन एभरेष्ट इन्स्योरेन्स लिमिटेडकी प्रमुख कार्यकारी अधिकृत अञ्जु श्रेष्ठ र चितवन राइनोजका अध्यक्ष तथा प्रबन्ध निर्देशक श्री आयुष न्यौपानेले सम्झौतापत्रमा हस्ताक्षर गरे ।

इन्स्योरेन्सले यो साझेदारीलाई खेल क्षेत्रमा जोखिम व्यवस्थापनको नयाँ दृष्टिकोणका रूपमा लिएको छ । खेल क्षेत्रमा विविध जोखिम रहने भएकालेयस विषयमा हिमालयन एभरेष्ट इन्स्योरेन्सले विशेष ध्यान दिएको प्रमुख कार्यकारी अधिकृत श्रेष्ठले बताइन् । यो सहकार्यबाट खेलकुद क्षेत्रको विकाससँगै खेलाडीहरूको सुरक्षाप्रति जागरूकता बढाउने अपेक्षा इन्स्योरेन्सले गरेको छ ।

कुशल मल्ल मार्की खेलाडी रहेको चितवन हाल एनपिएलको अन्तिम तयारीका लागि भारतमा छ । कलाम अलीलाई मुख्य प्रशिक्षकको जिम्मेवारी सुम्पिएको टोलीले विदेशी खेलाडीमा गत सिजन खेलेका रवी बोपरा र सोहेल तन्भिरलाई अनुबन्ध गरिसकेको छ । यस्तै इंग्ल्यान्डका पूर्व ओपनर डाविड मलानले पनि राइनोजका लागि खेल्दैछन् । युगान्डाका अल्पेश रामजनी पनि चितवनसँग अनुबन्धित भएका छन् ।

टोली : कुशल मल्ल, कमल सिंह ऐरी, रिजन ढकाल, देव खनाल, अर्जुन साउद, विपिन आचार्य, दीपक बोहरा, विपिन रावल, गौतम केसी, अमर राउटेला, गौतम केसी