काठमाडौं (हाम्रो खेलकुद)- नेपालले आइसिसी विश्वकप क्रिकेट लिग टु अन्तर्गत युएईमा जारी त्रिकोणात्मक सिरिजमा घरेलु टोलीलाई २ सय ४० रनको मध्यम चुनौती दिएको छ।

आइसिसी एकेडेमी दुबईमा टस जितेर युएईले नेपाललाई पहिले ब्याटिङको लागि उतार्यो। नेपालले ५० ओभरमा ९ विकेट गुमाएर २ सय ३९ रन बनायो।

नेपालले दोस्रो ओभरमा नै ओपनर कुशल भुर्तेललाई गुमायो। कुशल २ रनमा आउट हुँदा नेपालले ४ रन मात्र बनाएको थियो। पहिलो पावर प्लेमा नेपालले १ विकेट गुमाउँदा ४१ रन जोडेको थियो।

आसिफ शेख र भीम सार्कीले दोस्रो विकेटको लागि ७४ रनको साझेदारी गरे। आसिफ ३४ रन जोडेर रन आउट भए। लगत्तै कप्तान रोहित पौडेल २ रनमा आउट भए। ३ विकेट गुमाउँदा नेपालले मात्र ८७ रन बनाएको थियो।

कमजोर सुरुवात गरेको नेपालको इनिङ्स त्यसपछि कुनै पनि खेलाडीले ठुलो इनिङ्स‌ खेल्न सकेनन्। ठूलो साझेदारी पनि बन्न सकेन। भीम चौथो विकेटको रुपमा आउट भए। ६८ बल खेलेर ७ चौका सहित ४८ रनको पारी खेलेर धुर्व परासरको बलमा आउट भए।

त्यसपछि दीपेन्द्र सिंह ऐरी ३७ रनमा र आरिफ शेख ३० रनमा आउट भए। ४२.५ ओभरमा १ सय ८७ रन बनाउँदा नेपालले ७ विकेट गुमाएको थियो। लगत्तै करण केसी सामना गरेको पहिलो बलमा रनको खाता नखोली र नन्दन यादव पनि १ रनमा आउट भए।

सातौं क्रममा आएका कुशल मल्लले नेपालको इनिङ्सलाई सम्हाले। ५१ बल खेल्दै १ चौका र ३ छक्का प्रहार गर्दै ४५ रनको पारी खेले। सन्दीप लामिछाने  १५  र ललित राजवंशी ४ रनमा अविजित रहे।

बलिङमा जुनेद सिद्दिकी, मोहम्मद जवादुल्लाह र धुर्व परासरले २/२ विकेट लिए। यो सिरिजमा नेपालले एउटा पनि खेल खेल्न सकेको छैन।‌