काठमाडौं (हाम्रो खेलकुद) – नेपाल प्रिमियर लिग (एनपिएल) को फ्रेन्चाइज टोली काठमान्डु गोर्खाजले शैक्षीक परामर्श संस्था केआइइसीसंग प्रायोजन सम्झौता गरेको छ ।

काठमान्डु गोर्खाजले मंसिर १ गते देखि सुरु हुने दोस्रो एनपिएलमा प्रतिस्पर्धा गर्दैछ । केआइइसीले विदेशमा अध्ययन गर्न चाहने र सफल अन्तर्राष्ट्रिय करियर निर्माण गर्न उत्सुक विधार्थीका लागि २० वर्ष देखि शैक्षिक परामर्श दिदै आएको छ ।

एनपिएलमा काठमान्डु गोर्खाजले जर्सीमा केआइइसीको लोगो राखेर खेल्ने छ । यसका लागि काठमान्डु गोर्खाज र केआइइसी बीच सम्झौता भएको छ ।

काठमान्डु गोर्खाजका कार्यकारी निर्देशक अनुभव सिरोहिया र केआइइसीका संस्थापक एवंम प्रमुख कार्यकारी अधिकृत राजेन्द्र रिजालले सम्झौतामा हस्ताक्षर गरेका थिए ।

काठमान्डु गोर्खाजका प्रमुख कार्यकारी अधिकृत सुरजसिंह ठकुरी र केआईईसीका बजार प्रवन्धक सुमित श्रेष्ठको रोहवरमा सम्झौता गरिएको थियो ।

गोर्खाजका कार्यकारी निर्देशक अनुभव सिरोहियाले केआइइसीले खेलकुदका विभिन्न क्षेत्रमा गर्दै आएको बजार व्यवस्थापन कार्यको प्रशंसा गरे ।

केआइइसीका संस्थापक रिजालले युवाहरुको भविष्यका लागि कार्य गर्दै आएको र एनपिएल पनि युवाहरुको ढुकढुकी भएकाले काठमान्डु गोर्खाजसंग जोडिएको बताए ।

काठमाडौं गोर्खाजले यसअघि नै मुख्य प्रायोजकको रुपमा वर्ल्ड लिंकसंग सम्झौता गरिसकेको छ । टोलीको गोल्ड पार्टनरको रुपमा शिखर इन्स्योरेन्स, ड्रिङ्क पार्टनरको रुपमा एक्सट्रिम इनर्जी ड्रिङ्कसंग प्रायोजन सम्झौता गरिसकेको छ । साथै टोलीको अफिसियल हस्पिटालिटी पार्टनरमा टुलिप होटल रहेको छ ।