काठमाडौं (हाम्रो खेलकुद)- नेपाली राष्ट्रिय क्रिकेट टोलीका कप्तान रोहित कुमार पौडेलले शैक्षिक यात्रालाई पनि सँगसँगै अघि बढाउने भएका छन्।

रोहितले फिनिक्स कलेज अफ म्यानेजमेन्टमा भर्ना भएका छन् । उनलाई कलेजले पूर्ण छात्रवृत्ति दिएको छ।

रोहित जस्तो सफल, अनुशासित र प्रेरणादायी व्यक्तित्व कलेज परिवारमा जोडिनुले विद्यार्थीहरूलाई नेतृत्व, अनुशासन र निरन्तर परिश्रमबारे थप उर्जा मिल्ने फिनिक्स कलेजले विश्वास व्यक्त गरेको छ।

कलेजका नेटवर्क निर्देशक राजु टण्डनले भने,’हामी देशका लागि योगदान पुर्‍याउने प्रतिभाशाली खेलाडीको शैक्षिक यात्रामा साथ दिन पाउँदा निकै हर्षित छौँ। शिक्षा र खेलकुद एकसाथ अघि बढ्न सक्छन् भन्ने उदाहरण दिन हामी सधैं तत्पर छौँ ।’

यसअघि पनि फिनिक्स कलेजले राष्ट्रिय टोलीका अन्य खेलाडीलाई पूर्ण छात्रवृत्ति प्रदान गर्दै खेलकुद र शिक्षा दुबै क्षेत्रको सन्तुलित विकासलाई प्रोत्साहन गर्दै आएको छ।

काठमाडौंको मैतीदेवीमा रहेको फिनिक्स लिंकन विश्वविद्यालयबाट सम्बन्धन प्राप्त गरी एमबिएबी तथा बिबिए कार्यक्रम सञ्चालन गर्ने नेपालको पहिलो कलेज हो । हाल कलेजमा लिंकन विश्वविद्यालय अन्तर्गतका एमबिए, बिबिए, बिएचएम, एमसिएस र बिआइटी कार्यक्रम संचालित छन्।

रोहितको नेतृत्वमा रहेको लुम्बिनी लायन्सले सोमवार सुरु हुने नेपाल प्रिमियर लिग (एनपिएल) मा प्रतिस्पर्धा गर्दैछ। एनपिएलमा ८ टोलीले प्रतिस्पर्धा गर्नेछ।