काठमाडौं (हाम्रो खेलकुद)- दोस्रो नेपाल प्रिमियर लिग (एनपिएल) मा गत संस्करणको फाइनलिष्ट सुदूरपश्चिम रोयल्सले काठमाडौं गोर्खाजलाई १ सय ४८ रनको प्रतिस्पर्धात्मक लक्ष्य दिएको छ।

काठमाडौंले‌ आज सानदार सुरुवात गर्दा हर्मित सिंहको विष्फोटक ब्याटिङमा सुदूर खेलमा फर्कियो।काठमाडौंका कप्तान करण केसीले टस जितेर बलिङ गर्ने निर्णय गरेपछि सुदूरले २० ओभरमा १० विकेट गुमाउँदै १ सय ४७ रन बनायो।

करणले बलिङको सुरूवात गरे। उनले टोलीलाई ड्रिम स्टार्ट दिए। दोस्रो बलमा जस ब्राउनलाई एलोबिडब्लु धरापमा पारे। करणले पहिलो विकेट लिंदा सुदूरले रनको खाता खोल्न सकेको थिएन।

त्यही ओभरको अन्तिम बलमा करणले अर्का ओपनर विनोद भण्डारीलाई भीम सार्कीद्वारा क्याच आउट भए। उनी पनि रन नजोडी आउट भए। पहिलो ओभरमा करणले मात्र १ रन दिएर २ ओपनरलाई पबिलियनको बाटो देखाए।

दोस्रो ओभरमा पनि साहब आलामले पनि मात्र १ रन दिए। सुरुवाती २ विकेट गुमेपछि क्रिस लिनबाट बढी अपेक्षा गरिएको थियो। तर उनलाई पनि करणले नै आउट गरे। २ रन बनाएका उनी मिलिन्द कुमारद्वारा समातिए। त्यतिखेर ३ विकेटको नोक्सानीमा मात्र ४ रन बनाएर सुदूरले निकै संघर्ष गर्यो।

छैटौं ओभरको अन्तिम बलमा मिलिन्दले इशान पाण्डेलाई ११ रनमा आउट गरे। काठमाडौंले सानदार सुरुवात गर्दै पहिलो पावर प्लेमा सुदूरपश्चिमलाई २७ रनमा रोक्यो। यतिखेर सुदूरले ४ विकेट गुमाइसकेको थियो।

पाँचौं विकेटका रुपमा आरिफ शेख २५ रनमा रसिद खानको बलमा एलबिडब्लु आउट भए। ९.४ ओभरमा सुदूरले ५ विकेटको नोक्सानीमा मात्र ५२ रन बनाएको थियो। त्यसपछि १० औं ओभरको अन्तिम बलमा १२ रनमा रहेका कप्तान दीपेन्द्र सिंह ऐरीले जीवनदान पाए। रसिद खानको बलमा साहबले क्याच ड्रप गरे।

त्यसपछि १४ औं ओभरको पहिलो बलमा नरेन साउदको क्याच आदिल अलामले ड्रप गरे। आदिलको क्याच लिने प्रयास तारिफयोग्य थियो। तर अर्को बलमा नरेन आउट भए। मिलिन्दको बलमा भीम सार्कीद्वारा क्याच आउट हुन पुगे। ६ विकेटको नोक्सानीमा सुदूरले ७२ रन जोडेको थियो।

१५ ओभरको समाप्तिमा ८० रन जोडेर संघर्ष गरेको सुदरले १६ औं र १७ औं ओभरमा रनको वर्षा गर्यो। हर्मितले विष्फोटक ब्याटिङ गरे। १६ औं ओभरमा २१ रन बन्यो। हर्मितको ३ छक्का प्रहार गरे।

त्यसपछि १७ औं ओभरमा करण बलिङमा आए। २ ओभर बलिङ गर्दा २ रन दिएर ३ विकेट लिएका करणले यो ओभरमा २४ रन खाए। हर्मितले १ चौका र लगातार ३ छक्का प्राहर गरे। हर्मितले पनि ४७ रनमा जीवनदान पाए। भीमले क्याच छुटाए।

दीपेन्द्र र हर्मितले सातौं विकेटको लागि ६१ रनको साझेदारी गरे। दीपेन्द्र ३९ रनमा रसिद खानको बलमा आउट भए। उनले ३० बलमा ३ चौका र १ छक्का प्रहार गरे। लगत्तै स्कट कुगेलिन १ रनमा सनी पटेलको बलमा बोल्ड आउट भए।

विष्फोटक ब्याटिङ गरेर इनिङ्सलाई उकासेका हर्मितले १९ बलमा अर्धशतक बनाए। उनले २ चौका र ६ छक्का प्रहार गरे। ५३ रन जोडेर उनी सनी को बलमा सहाबबाट समातिए।

बलिङमा करणले सर्वाधिक ४ विकेट लिए। उनले ४ ओभरमा ३० रन दिए। मिलिन्द, सनी र रसिदले समान २ विकेट झारे। काठमाडौं लगातार दोस्रो जितको खोजीमा रहँदा सुदुरको यो पहिलो खेल हो।