काठमाडौं (हाम्रो खेलकुद)- दोस्रो नेपाल प्रिमियर लिग (एनपिएल) मा आज लुम्बिनी लायन्सले कर्णाली याक्सलाई जितको १ सय ५७ रनको चुनौती दिएको छ।

टियु क्रिकेट मैदानमा कर्णालीका कप्तान सोमपाल कामीले टस जितेर पहिले ब्याटिङ गर्ने निर्णय गरेपछि लुम्बिनीले निर्धारित २० ओभरमा ७ विकेट गुमाउँदै १ सय ५६ रन बनायो।

लुम्बिनीले सुरुवातमा निकै संंघर्ष गर्यो। पहिलो ओभरमा मात्र १ रन बनाएको लुम्बिनीले दोस्रो ओभरको तेस्रो बलमा ओपनर सन्दीप जोरालाई गुमायो। नन्दन यादवको बलमा विलियम बसिस्टोले आकर्षक क्याच लिए।

१ रन जोड्दा लुम्बिनीले पहिलो विकेट गुमायो। ४ ओभर सकिंदा लुम्बिनीले मात्र ७ रन जोडेको थियो। पावर प्लेलाई सदुपयोग गर्न नसकेको लुम्बिनीले छैटौं ओभरमा ४ चौका सहित १८ रन जोड्यो। यो सँगै पहिलो पावर प्लेमा ३६ रन बटुल्यो।

यसपछि सातौं र आठौं ओभरमा लुम्बिनीले २ विकेट गुमायो। डार्सी सर्ट १९ रनमा गुल्सन झाको बलमा आउट भए। यतिखेर टिमले ३७ रन बनाएको थियो।

तेस्रो विकेटको रूपमा ६ रन बनाएका दिलिप नाथलाई मार्क वाटले कट एन्ड बोल्ड गरे। तेस्रो विकेट गुमाउँदा लुम्बिनीले ४६ रन बनायो।

त्यसपछि गुल्बद्दिन नायबको ठुलो विकेट विपिन प्रसाद शर्माले लिए। उनी ७ रनमा एलबिडब्लु आउट भए। यो ‌सँगै कर्णालीले लुम्बिनीलाई दबाब दिन सफल रहयो। टोलीले ६१ रनको स्थितिमा ४ विकेट गुमायो। सुमित ४ रनमा पबिलियनको फर्किए।

यसपछि कप्तान रोहित पौडेल अर्धशतकबाट मात्र एक रनले चुके। ४३ बलमा ४ चौका र २ छक्का सहित ४९ रन बनाएर सोमपालको बलमा नजिबल्लाह जड्रानद्वारा क्याच आउट भए। रोहित आउट हुँदा लुम्बिनीले १६.४ ओभरमा ६ विकेट गुमाउँदै १ सय १३ रन बनाएको थियो।

अन्तिम ५ ओभरमा लुम्बिनीले ६८ रन बनाउँदै कमब्याक गर्यो। जेजे स्मिथ १४ बलमा २३ रन बनाएर आउट भए। रूबेन ट्रम्पलम्यानले १४ बलमा अविजित २९ रन बनाए। उनले १ चौका र ३ छक्का प्रहार गरे।

बलिङमा नन्दन यादवले ४ ओभरमा रन दिएर २ विकेट लिए।‌ यस्तै सोमपाल, गुल्सन, मार्क, विपिन र युवराजले १/१ विकेट लिए।‌

लुम्बिनी लगातार दोस्रो जितको दाउमा रहनेछ। लुम्बिनीले पहिलो खेलमा चितवनलाई ६ विकेटले हराएको थियो। यता कर्णाली भने अंक जोड्ने प्रयासमा छ। कर्णाली पहिलो खेलमा चितवनसँग ४ विकेटले हारेको थियो।

आज हुने दोस्रो खेलमा विराटनगर किंग्स र काठमाडौं गोर्खाजबीच खेल हुनेछ।