काठमाडौं(हाम्रो खेलकुद)- दोस्रो नेपाल प्रिमियर लिग (एनपिएल) मा आज साविक विजेता जनकपुर बोल्ट्सले विराटनगर किंग्ससँग खेल्दैछ।

टस जितेर जनकपुरले पहिले बलिङ गर्ने निर्णय गरेको छ। विराटनगर पहिले ब्याटिङमा उत्रनेछ। आज विराटनगरले प्लइङ ११ मा कुनै परिवर्तन गरेको छैन। जनकपुरले २ परिवर्तन गरेको छ। आदित्य महता र संगित कुरेलाई अवसर दिंदा विका आग्री र लहिरु समारुकुनलाई ड्रप गरिएको छ।

आज जनकपुर पहिलो जितका साथ अंक जोड्दै कमब्याक गर्ने दाउमा रहेको छ। जनकपुर पहिलो खेलमा काठमाडौंसँग ५ विकेटले पराजित भएको थियो।

विराटनगर भने लगातार तेस्रो जित निकाल्ने लक्ष्यमा रहेको छ। उसले पहिलो खेलमा पोखरा एभेन्जर्सलाई तथा दोस्रो खेलमा काठमाडौंलाई हराउँदै ४ अंक जोडिसकेको छ।

विराटनगरले पहिलो खेलमा भने एनपिएलकै सर्वाधिक २ सय २० रनको योगफल बनाएको थियो। विदेशी खेलाडीको प्रदर्शन उत्कृष्ट रहेको छ।

जनकपुर पछिल्लो सिजन भन्दा यो पटक केहि कमजोर देखिएको छ। उसले आज विराटनगको सामना गर्दा सुधारिएको प्रदर्शन गर्ने चुनौती रहेको छ।

आज हुने दोस्रो खेलमा सुदूरपश्चिम रोयल्स र कर्णाली याक्सबीच खेल हुनेछ। अंक तालिकामा सुदूरपश्चिम र विराटनगरले समान ४ अंक जोडेको छ।

सुदुरपश्चिम रन रेटको आधारमा शीर्षस्थानमा रहेको छ। कर्णाली, लुम्बिनी, चितवन र काठमाडौंले २/२ अंक जोडेका छन्। जनकपुर र पोखराले मात्र अंकको खाता खोल्न सकेका छैन ।