काठमाडौं (हाम्रो खेलकुद)- दोस्रो नेपाल प्रिमियर लिग (एनपिएल) मा सुदूरपश्चिम रोयल्सले कर्णाली याक्सलाई १ सय ४० रनको चुनौती दिएको छ।

टस जितेर कर्णालीले ब्याटिङ गर्ने निर्णय गर्दा सुदूरपश्चिमले पहिले ब्याटिङमा उत्रियो। उसले २० ओभरमा विकेट ९ विकेट गुमाउँदै १ सय ३९ रन बनायो।

पहिलो ओभर बलिङ गर्न आएका कर्णालीका कप्तान सोमपाल कामीले विकेट मेडन ओभरबाट सानदार सुरुवात गरे। उनले इनिङ्सकै पहिलो बलमा ओपनर जस ब्राउनलाई रोयल डक आउट गरे।

त्यसपछि अर्का ओपनर विनोद भण्डारी ११ रनमा विपिन शर्माको बलमा एलबिडब्लु आउट भए। दुई ओपनर आउट हुँदा सुदूरपश्चिमले २३ रन मात्र जोडेको थियो। सुदुरले पहिलो पावर प्लेमा कमजोर प्रदर्शन गर्यो। २ विकेटको नोक्सानीमा मात्र २७ रन बनाउँदै कमजोर सुरुवात गर्यो।

सुदूरपश्चिमलाई दबाबमा राख्न सफल कर्णालीका युवराज खत्रीले आठौं ओभरमा क्रिस लिनको महत्वपूर्ण विकेट लिए। २० बलबाट १८ रन बनाएका लिन विलियम बसिस्टोद्वारा क्याच आउट भए।

लगत्तै अर्को ओभरमा इशान पाण्डे पनि मात्र २ रनमा आउट भए। ४६ रन जोड्दा ४ विकेट गुमाएको सुदूरपश्चिमले १० ओभरको समाप्तिमा ५३ रन मात्र बनाउन सक्यो।

टप र मिडर अर्डरका खेलाडीले खराब प्रदर्शन गरे भने साझेदारी बन्न सकेन्। आरिफ शेख नन्दन यादवको बलमा बोल्ड आउट भए। २५ बल खेलेर ३ चौका सहित २७ रन बनाए। ७३ रन जोड्दा सुदुरले ५ विकेट गुमायो।

त्यसपछि कर्णालीले १७ देखि १९ ओभरमा लगातार विकेट झार्न सफल रहयो। क्रिजमा छिरेका हर्मित सिंहले दीपेन्द्र‌सिंह ऐेरीसँग छैटौं विकेटको लागि ४८ रनको साझेदारी गरेर आउट भए।

१९ रन जोडेका उनलाई सोमपालले बोल्ड आउट गरे। लगतै अर्को ओभरमा मार्क वाटले दीपेन्द्रको ठुलो विकेट लिए। २८ बल खेल्दै १ चौका र २ छक्का सहित ३९ रनमा आउट भए।

त्यसपछि नरेन साउद सोमपाल कामीको बलमा ‘हिट विकेट’ आउट भए। ब्याक फुटमा ब्याटिङ गर्ने क्रममा आफ्नै खुट्टाले बेल झारेपछि उनी रनको खाता नखोली आउट भए। लगतै १० रन बनाएका स्कट कुगेलिनलाई नन्दनले आउट गरे। हेमन्त धामी र अविनाश बोहरा अविजित १ रनमा रहे।

बलिङमा सोमपाले ४ ओभरमा ३२ रन दिएर ३ विकेट लिए। नन्दनले २ तथा मार्क, विपिन र युवराजले १/१ विकेट झारे।

आज भएको पहिलो खेलमा भने विराटनगर किङ्सले कम योगफलको रोमाञ्चक खेलमा साविक विजेता जनकपुरलाई ९ रनले हराउँदै लगातार दोस्रो जित निकालेको छ। जनकपुरले भने दोस्रो खेलपछि पनि अंकको खाता खोल्न सकेको छैन।