काठमाडौं (हाम्रो खेलकुद)- दोस्रो नेपाल प्रिमियर लिग (एनपिएल) मा आज काठमाडौं गोर्खाज र लुम्बिनी लायन्सबीच खेल हुँदैछ।

टियु क्रिकेट स्टेडियममा लुम्बिनीका कप्तान रोहित पौडेलले टस जितेर पहिले ब्याटिङ रोज्ने सिलसिलालाई निरन्तरता दिएका छन्।

जारी एनपिएलमा टस जित्ने टोलीले बलिङ नै रोज्दै आएको छ। करण केसीको कप्तानीमा रहेको काठमाडौं पहिले ब्याटिङमा आउनेछ।

जनकपुरलाई ५ विकेटले हराउँदै विजयी सुरूवात गरेको काठमाडौले त्यसपछि भने लगातार २ खेल हारेको छ। सुदूरपश्चिम रोयल्ससँग २९ रनले र विराटनगर किंग्ससँग ५ विकेटले हार बेहोरेको थियो।

३ खेलबाट २ अंक मात्र बनाएको काठमाडौंलाई आजको खेल निकै महत्वपूर्ण रहनेछ। आज हारेको खण्डमा काठमाडौंको प्ले अफको यात्रा कठिन हुनेछ।

पछिल्लो खेलमा विराटनगरसँग काठमाडौंले खराब ब्याटिङ गरेको थियो। टप र मिडल अर्डरका खेलाडीले खराब प्रदर्शन गर्दा मात्र १ सय ३४ रन मात्र बनाएको थियो। त्यसैले पनि आज ब्याटिङमा सुधारिएको प्रदर्शन गर्न जरुरी छ।

गत संस्करण पुछारमा रहेको लुम्बिनी यो सिजन पहिलो खेलमा चितवनलाई ६ विकेटले हराउँदै विजयी सुरुवात गरेको थियो। लुम्बिनीले पहिलो खेलमा चितवनलाई ६ विकेट हरायो। तर दोस्रो खेलमा भने कर्णालीसँग ९ विकेटले पराजित भयो।

कर्णालीसँगको खेलमा रोहितले ४९ रन जोड्दा अन्य खेलाडी क्रिजमा टिक्न सकेका थिएनन्। यसपछि कर्णालीका मार्क वाटले शतक प्रहार गर्दै लुम्बिनीलाई ९ विकेटको लज्जास्पद हार चखाएको थियो। बलिङमा सेर मल्लले मात्र एक विकेट झारेका थिए। त्यसैले आज बलिङमा पनि लुम्बिनी सजग हुनुपर्नेछ।

अंक तालिकामा सुदूरपश्चिम र विराटनगरले समान ६ अंक बनाए पनि रनरेटमा सुदूरपश्चिम शीर्षस्थानमा र विराटनगर दोस्रो स्थानमा छन्।

कर्णाली, काठमाडौं, चितवन र काठमाडौंसँग समान २ अंक रहेको छ। पोखरा र जनकपुरले अंकको खाता खोल्न सकेका छैनन्।