काठमाडौं (हाम्रो खेलकुद)- नेपाल प्रिमियर लिग (एनपिएल) को दोस्रो सिजनमा आजको दोस्रो खेलमा जनकपुर बोल्ट्स र पोखरा एभेन्जर्सबीच खेल हुँदैछ।

टस जितेर पोखराले पहिले ब्याटिङ गर्ने निर्णय गरेको छ। जारी एनपिएलको १४ औं खेलमा टस जित्ने टोलीले ब्याटिङ रोजेको यो पहिलो पटक हो।

यसअघि सबै खेलमा टस जित्ने टोलीले पहिला फिल्डिङ रोज्दै आएका थिए। साविक विजेता जनकपुरले पहिला बलिङ गर्नेछ।

अघिल्लो खेलमा भन्दा पोखराले १ खेलाडी परिवर्तन गरेको छ। पोखराले तृतराज दासलाई टोलीमा समेटेको छ। जनकपुरले भने प्लेइङ ११ मा ३ खेलाडी परिवर्तन गरेको छ। शुभ कंसाकार, माज सदाकत र वायन पार्नेललाई पहिलो पटक अवसर दिएको छ।

पुछारमा रहेका दुई टोली पोखरा र जनकपुर मध्ये आज एउटा टोलीले अंकको खाता खोल्नेछ। दुवै टोलीको यो तेस्रो खेल हो। दुवै टोलीले यसअघिका दुवै खेल हारेका थिए।

जनकपुर पहिलो खेलमा काठमाडौं गोर्खाजसँग ५ विकेटले र दोस्रो खेलमा विराटनगर किङ्स सँग ९ रनले पराजित भएको थियो। पोखरा विराटनगरसँग ५३ रन र सुदूरपश्चिम रोयल्ससँग १८ रनले हारेको थियो।

आजको खेलमा पोखराले हरियो जर्सी लगाउनेछ। जसमा ‘ग्लासियर्स म्याटर’ लेखिएको हुनेछ। जनकपुरका खेलाडीले आफ्नो आमाको नाम अंकित जर्सी लगाउनेछन्।

आज दुवै टोलीको जर्सी अक्सन गरेर जम्मा भएको रकम पोखराले जलवायु परिवर्तन सम्बन्धि कार्य गर्ने संघ संस्थालाई प्रदान गर्नेछ। जनकपुरले जेनजी आन्दोलनमा सन्तान गुमाएका आमाहरूलाई सहयोग गर्ने बताइएको छ।