काठमाडौं (हाम्रो खेलकुद)- दोस्रो नेपाल प्रिमियर लिग (एनपिएल) मा आज काठमाडौं गोर्खाजले‌ चितवन राइनोजलाई १ सय ४३ रनको चुनौती दिएको छ।‌

टियु क्रिकेट स्टेडियममा टस जितेर चितवनका कप्तान कुशल मल्लले बलिङ रोजे। पहिले ब्याटिङ गरेको काठमाडौंले १९.४ ओभरमा अल आउट हुँदै १ सय ४२ रनमा समेटियो।

खराब सुरुवात गरेको काठमाडौको लागि मिलिन्द कुमार र सिम्पसनले राम्रो साझेदारी गरे। तर त्यसपछि काठमाडौंले २३ बलमा २० रन जोड्दा ७ विकेट गुमायो।

काठमाडौंले कमजोर सुरुवात गर्यो। पहिलो पावर प्लेमा ३९ रन मात्र बनाउँदा टप अर्डरका ३ खेलाडीलाई गुमायो। दोस्रो ओभरको अन्तिम बलमा आकाश त्रिपाठी रन आउट भए। मात्र ४ रन बनाएका ओपनर आकाशलाई चितवनका विकेट किपर अर्जुन साउदले रन आउट गर्दा काठमाडौंले १४ रन बनाएको थियो।

वान डाउनमा क्रिजमा छिरेका रसिद खानलाई रन्जित कुमारले रबि बोपराद्वारा क्याच आउट गराए। ६ रन जोडेर रसिद आउट भए। ३ ओभरको समाप्तिमा ३ विकेटको नोक्सानीमा मात्र २० रन जोडेको थियो।

त्यसपछि पाँचौ ओभरमा अर्का बेन्स चार्लसवर्थ १४ बल खेल्दै १३ रनमा सोहेल तनबीर बलमा बोपराद्वारा नै क्याच आउट भए। तेस्रो विकेटको नोक्सानीमा २४ रन मात्र जोडेको काठमाडौंको टप अर्डरको प्रदर्शन निराशाजनक रहयो। १० ओभरको समाप्तिमा काठमाडौंले ५९ रन बनायो।

क्रिजमा रहेका दुई विदेशी मिलिन्द र जोन सिम्पसनले जिम्मेवारीपूर्ण ब्याटिङ गरे। यो क्रममा सिम्पसनले २६ औं सोहरल तनबीरको बलमा छक्का प्रहार गर्दै अर्धशतक बनाए। उनले ३ चौका र ४ छक्का प्रहार गरे।

पाँचौ खेलमा काठमाडौंका कुनैपनि खेलाडीले प्रहार गरेको यो पहिलो अर्धशतक पनि हो। यसपछि सिम्पसन र मिलिन्दले चौथो विकेटको लागि ६८ बलबाट ९८ रनको महत्वपूर्ण साझेदारी रवि बोपराले तोडे।

४३ बल खेल्दै ४ चौका सहित ३८ रन जोडेर मिलिन्द आउट भए। उनी आउट हुँदा काठमाडौंले १६ ओभरको समाप्तिमा १ सय २२ रन बनाएको थियो।

मिलिन्द आउट भएपछि थप ११ रन जोड्ने क्रममा काठमाडौंले ६ विकेट गुमाउँदा काठमाडौं नराम्रोसँग धराशायी बन्यो। कप्तान कमल ऐरीले सिम्पसनको ठूलो विकेट झारे। २९ बलमा ३ चौका र ५ छक्का सहित ६० रनको पारी खेले।

१८ औं ओभरमा सोहेल ३ विकेट झार्न सफल रहे। जेराड इरासमस रनको खाता नखोली, आदिल ८ रनमा र सन्तोष यादव पनि रनको खाता नखोली आउट भए।

लगतै १९ औं ओभरको पहिलो बलमा रन्जित कुमारले १ रन बनाएका करण केसीलाई दीपेन्द्रद्वारा क्याच आउट गराए। ६ रन बनाएका दुपेश कँडेललाई कमलले आउट गरेसँगै चितवन काठमाडौंलाई अल आउट गर्न सफल रहयो।

बलिङमा सोहेलले ४ ओभरमा २५ रन दिएर ४ विकेट लिए। रन्जित र कमलले २/२ तथा १ विकेट झारे।चितवनका ३ खेलमा २ जित र १ खेलमा हार बेहोरेको छ। काठमाडौंले समान २ खेलमा जित र हार भोगेको छ।

दुबैको‌ समान ४ अंक हुँदा चितवन तेस्रो र काठमाडौं चौथो स्थानमा छ। शीर्ष दुईमा सुदुरपश्चिम रोयल्स र विराटनगर छन्। आज विराटनगर र कर्णालीबीच दोस्रो खेल हुनेछ।