काठमाडौं (हाम्रो खेलकुद)- दोस्रो नेपाल प्रिमियर लिग (एनपिएल) मा कर्णाली याक्सले विराटनगर किंग्सलाई १ सय ६१ रनको प्रतिस्पर्धात्मक चुनौती दिएको छ।

टस जितेर पहिले ब्याटिङ गरेको लुम्बिनीले २० ओभरमा ३ विकेट गुमाउँदै १ सय ६० रन बनायो। ओपनर मार्क वाट तेस्रो ओभरको पाँचौं बलमा आउट भए। ६ रन बनाएका उनी मर्सान्ट डी लाङ्गेको बलमा जर्ज मुन्सेद्वारा क्याच आउट भए।

२३ रन जोड्दा पहिलो विकेट गुमाएपछि वान डाउनमा विलियम बसिस्टो क्रिजमा छिरे। बसिस्टोले २ रन बनाउँदा जीवनदान पाए। लाङ्गेले उनको क्याच ड्रप गरे। पहिलो पावर प्लेमा कर्णालीले ३७ रन जोड्यो।

बसिस्टो र प्रियांक पाञ्चाल क्रिजमा थिए। १० ओभरको समाप्तीमा कर्णालीले मात्र १ विकेट गुमाएर ६५ रन बनाउँदा विराटनगरका बलरहरू दबाबमा आए।

ओपनर प्रियंकले ४० बलमा ४ चौका र २ छक्का सहित अर्धशतक बनाए। जारी एनपिएलमा यो उनको दोस्रो अर्धशतक हो। यी दुईले दोस्रो विकेटको लागि ९६ रनको उत्कृष्ट साझेदारी गरे। यो साझेदारी तोड्न विराटनगरलाई ८२ बल नै कुर्नुपर्यो।

प्रतिशको बलिङमा प्रियांक विकेटकिपर साहिल पटेलद्वारा रन आउट हुन पुगे। उनले ४७ बलमा ६ चौका र २ छक्का सहित ६३ रन बनाए।

त् यसपछि गुल्सन झा क्रिजमा छिरे। गुल्सन १० बलमा २ चौका र १ छक्का सहित २० रन जोडेर सन्दीपको बलमा एलबिडब्लु धरापमा परे। गुल्सन आउट हुँदा टिमले १ सय ४६ रन बनाएको थियो। २ रनमा जीवनदान पाएका बसिस्टो अवजित ४८ रनमा रहे। उनले ४८ बलमा २ चौका प्रहार गरे।

बलिङमा विराटनगरले उत्साहजनक प्रदर्शन गर्न सकेन। मर्सान्ट र सन्दीपले १/१ विकेट लिए।

कर्णालीले आज प्लेइङ ११ मा १ र विराटनगरले ३ खेलाडी परिवर्तन गरेको छ। कर्णालीका अर्जुन घर्तीको स्थानमा दीपक डुन्रेलाई स्थान दिइएको छ।

विराटनगरका सुर्य तामाङ, नरेन भट्ट र शुभम रञ्जानेको स्थानमा साहिल पटेल, सुबाश भण्डारी र शरहान जयसुर्यालाई खेलाइएको छ।