काठमाडौं (हाम्रो खेलकुद)- दोस्रो नेपाल प्रिमियर लिग (एनपिएल) मा आज २ खेल हुँदैछन्।

पहिलो खेलमा पोखरा एभेन्जर्स र लुम्बिनी लायन्सबीच खेल हुँदैछ। टस जितेर लुम्बिनीका कप्तान रोहित पौडेलले बलिङ गर्ने निर्णय गरेको छ। यो सँगै पोखराले पहिले ब्याटिङ गर्नेछ।

लुम्बिनीले प्लेइङ ११ एक परिवर्तन गरेको छ। लुम्बिनीले निरोसन डिकवेलालाई थोमस पार्काको स्थानमा खेलाएको छ। पोखराले भने २ परिवर्तन गरेको छ। आकाश चन्द र ड्यान डाउथवेटको स्थानमा म्याट टेलर र अभिषेक तिवारीलाई खेलाएको छ।

पोखराको लागि यो चौथो खेल हो। उसले २ मा हार र १ मा जित निकालेको छ। लुम्बिनीको भने पाँचौं खेल हो। उसले पनि मात्र १ खेल जित्दा बाँकी ३ खेलमा लगातार हार बेहोरेको छ। त्यसैले दुवै टोलीलाई जित आवश्यक छ।

लुम्बिनीलाई भने प्ले अफ संभावनालाई जिवितै राख्न पनि जितको विकल्प छैन । हारले लुम्बिनीको प्ले अफ संभावना अंक गणितमा मात्र बाँकी रहनेछ। गर या मरको स्थितिमा रहेको छ। गत संस्करण पुछारमा रहेको लुम्बिनीलाई थप दबाब भने रहेको छ।

यता पोखराले पनि मात्र १ खेल जितेको कारण उसलाई पनि जित उतिकै जरुरी रहेको छ। अंक तालिकामा पोखरा छैटौं र लुम्बिनी सातौं स्थानमा छन्।

सुदूरपश्चिम रोयल्स जारी एनपिएलको‌ एक मात्र अपराजित टोली हो। टोली ४ खेल जितेर ८ अंक सहित शीर्षस्थानमा रहेको छ। ५ खेल खेलेर ८ अंक बनाएको विराटनगर दोस्रो स्थानमा छ।

आजै हुने दोस्रो खेलमा गत संस्करणको फाइनलिष्ट सुदुरपश्चिम र जनकपुर बोल्ट्सबीच प्रतिस्पर्धा हुँदैछ। यो पटक जनकपुरको स्थिति गत संस्करण भन्दा ठीक विपरीत रहेको छ। अंकको खाता खोल्न नसकेको जनकपुर लिग अंक तालिकाको पुछारमा छ।