काठमाडौं (हाम्रो खेलकुद)- विराटनगर किङ्सले नेपाल प्रिमियर लिग (एनपिएल) को पहिलो क्वालिफायरमा सुदूरपश्चिम रोयल्सबाट १ सय ५६ रनको मध्यम लक्ष्य पाएको छ।

टस जितेर विराटनगरले फिल्डिङ रोजेको थियो। पहिला ब्याटिङ गरेको सुदूरपश्चिमले ७ विकेटको नोक्सानीमा १ सय ५५ रन बनायो ।

सुदूरपश्चिमलाई विराटनगरले दबाबमा राखेको थियो। यद्दपी लामो समय ब्याटिङ गरेका ओपनर विनोद भण्डारीले अर्धशतक पूरा गर्दै धर्यतापूर्वक एउटा एन्ड सम्हाले । सुदूरपश्चिमले पावर प्लेमा १ विकेटको क्षतिमा ४२ रन बनायो ।

तेस्रो ओभरमा पाँचौं बलमा मर्चेन्ट डि लाङ्गेले मुख्तार अहमद १० को विकेट लिए । सूर्य तामाङले ७.५ ओभरमा २० रन बनाएका सेल्डन ज्याक्सनलाई आउट गरे। २९ रनमा विनोद भण्डारीलाई बसिर अहमदले जीवन दान दिए।

नरेन भट्टको बलमा उनले क्याच ड्रप गरे। १० ओभरको समाप्तिमा २ विकेटको क्षतिमा ७७ रन बनाएको थियो।
१३.५ ओभरमा साम हेजलेटको बलमा इशान पाण्डे १३ रन बनाएर आउट भए । उनको मुस्किल क्याच नरेन भट्टले लिए।

१३.४ ओभरमा बाहिरको बलमा ३ रन बनाएका दीपेन्द्र सिंह ऐरी लाङ्गेद्वारा रन आउट भए। विनोदले ४४ बलमा ३ चौका र १ छक्का दोस्रो अर्धशतक पूरा गरे।

१६.३ओभरमा प्रतिश जिसीले हर्मित सिहंलाई १४ रनमा आउट गरे। १८.५ ओभरमा ६३ रनमा विनोद प्रतिशको बलमा आउट भए । २० रन बनाएका आरिफ १९.४ ओभरमा लाङ्गेको बलमा आउट भए।

लाङ्गे र प्रतिशले समान २ तथा सूर्य र साम हेजलेटले समान १ विकेट लिए। किफायती बलिङ गरेका कप्तान सन्दीप लामिछाने विकेट लिन सकेनन् । उनले ४ ओभरमा १६ रन मात्र खर्चे । यसअघि उनले सबै खेलमा गरि १५ विकेट लिएका थिए।