बालागोल्ला (एजेन्सी)– श्रीलंका र भारत बीचको एक दिवसीय श्रृंखलाको दोश्रो खेल आज श्रीलंकाको बालागोल्लास्थित पालेकेले अन्तर्राष्ट्रिय क्रिकेट मैदानमा खेलिँदै छ । पहिलो खेलमा भारतले श्रीलंकामाथि ९ विकेटको सहज जित दर्ता गरेको थियो ।
ओपनर शिखर धवनको १ सय ३२ रनको शतकीय पारी र कप्तान विराट कोहलीको ८२ रनको मद्दतले भारतले पहिलो खेल सजिलैले आफ्नो पक्षमा पार्दै एक दिवसीय श्रृंखलामा १-० को अग्रता बनाएको थियो ।
श्रीलंकाका टेस्ट कप्तान दिनेश चन्डिमाललाई पहिलो खेलमा समावेश नगरेका कारण खेलपछि प्रशिक्षक र कप्तानले आलोचना बेहोर्नु परेको थियो । त्यसैले दोश्रो खेलमा चन्डिमाल टोलीमा समावेश हुने सम्भावना छ । पहिलो खेलमा राम्रो लयमा देखिएको भारतले भने उही टोलीलाई मैदानमा उतार्ने लगभग पक्का छ ।
विश्वकपमा स्वतः छनोट हुन श्रीलंकाले श्रृंखलाको पाँचमध्ये कम्तिमा दुई खेल जित्न जरुरी छ । त्यसैले श्रीलंकाका कप्तान उपुल थरगां विश्वकपमा स्थान पक्का गर्ने लक्ष्य लिएर मैदानमा उत्रने छन् भने भारतका कप्तान विराट कोहली आफ्नो टोलीको जितको लयलाई निरन्तरता दिन खोज्नेछन् ।
एक दिवसिय वरियतामा भारत तेस्रो स्थानमा रहेको छ भने श्रीलंका आठौँ स्थानमा छ । आजको खेल नेपाल समयअनुसार दिउँसो २ः४५ बजे सुरु हुने छ ।
