काठमाडौं (हाम्रो खेलकुद) – लगातार दोस्रो खेल जितेपछि नेपाली युवा टोली एसीसी यू १९ पूर्वी क्षेत्र क्रिकेट प्रतियोगिताको सेमिफाइनलमा पुगेको छ । लगातार दोस्रो खेलमा फराकिलो जित हात पार्ने क्रममा नेपालले आज कमजोर भुटानलाई ९ विकेटको फराकिलो अन्तरले हराएको छ । नेपालले सोमबार पहिलो खेलमा थाइल्यान्डलाई २ सय ५५ रनले हराएको थियो ।
भुटानले छाडेको ५१ रनको लक्ष्य नेपालले मात्र १ विकेटको क्षेतिमा भेट्टाएको थियो । नेपालले ८.३ ओभरमा लक्ष्य प्राप्त गरेको थियो । सन्दीप सुनार २१ रनमा आउट भए । आसिफ शेख २३ र अनिल शाह ४ रनमा अविजित रहँदा नेपालले खेल जितेको थियो । आसिफले २१ बलमा ३ चौका प्रहार गरे । सन्दीले २६ बलमा ४ चौका हाने । भुटानका लागि एकमात्र सफलता छिरिङ पेन्जोरले लिए ।
त्यसअघि टस जितेर ब्याटिङ गरेको भुटान लामो समय टिक्न सकेन । भुटानले २८ ओभरमा ५० रन बनाउँदा सबै विकेट गुमायो । कप्तान दीपेन्द्र सिंह ऐरी र सन्दीप लामाछिनेले ९ विकेट लिएका थिए । दीपेन्द्रले ५ विकेट र सन्दीपले ४ विकेट लिएका थिए । दीपेन्द्रले ८ ओभरमा २३ रन खर्चे भने सन्दीपले ७ ओभरमा ३ मेडनसहित ७ रनमात्र दिए । सन्दीपले थाइल्यान्डसँगको खेलमा ७ विकेट लिएका थिए ।
भुटानका उग्वेन डोर्जीले १३ र तासी फुन्त्सोले १६ रन बनाए भने अन्य कुनै ब्याट्सम्यानले दोहोरो अंकमा रन बनाउन सकेनन् । भुटानका चार ब्याट्सम्यानले रनको खाता समेत खोल्न सकेनन् ।
समुह ‘ए’ मा रहेको छ नेपाल र सिंगापुरले लगातार २ जित हासिल गरेका छन् । समूहका शीर्ष दुई टोली सेमिफाइनल पुग्नेछन् । नेपाल र सिंगापुरबीच बिहिबार हुने खेलले समूह विजेताको टुंगो लगाउनेछ । पूर्व क्षेत्रको फाइनलमा पुग्ने दुई टोलीले एसिसी एसिया कप यू १९ मा प्रवेश पाउनेछन् ।
