काठमाडौं (हाम्रो खेलकुद) – बंगलादेशको युवा टोलीसँगको तीन अभ्यास खेल नेपाली टोलीका लागि निकै फलदायी भएको प्रशिक्षक विनोद दासले बताएका छन् । सोमबार राति स्वदेश फर्केको टोली एसीसी यू १९ एसिया कपमा भाग लिन हिजो राति मलेसिया गएको छ ।

 

बंगलादेश भ्रमणमा सुरुआती दुई खेलमा पराजित नेपाली टोलीले अन्तिम खेल जितेको थियो । बंगलादेशमा सिकेका चिजलाई खेलाडीले मलेसियामा प्रयोग गर्ने आशा व्यक्त गर्दै प्रशिक्षक दासले भने, ‘ब्याटिङमा केही सुधार आएको छ, खेलाडीको प्रदर्शनबाट सन्तुष्ट हुने ठाँउ छ ।मलेसियामा पनि सक्दो राम्रो क्रिकेट खेल्दै हरेक खेल जित्नको लागि प्रयास गर्नेछौं ।’ खेलाडीमा क्षमताको कुनै कमी नरहेको उल्लेख गर्दै मलेसिया जानुअघि उनले थपे, ‘ सोचे अनुरुपको गर्न सक्छौं कि सक्दैनौ भन्ने मुख्य विषय हो ।’

एसिया कपमा कात्र्तिक २५ गते बंगलादेशसँग खेल्दै प्रतियोगिताको शुरुवात गर्नेछ । समूह ‘ए’ मा नेपाल, बंगालदेशसहित भारत र आयोजक मलेसिसया रहेको छ । नेपालको दोस्रो खेल कार्तिक २६ गते भारतसँग खेल्नेछ ।

समूह चरणको अन्तिम खेल कार्तिक २८ गते नेपालले आयोजक मलेसियाको सामना गर्नेछ । भारत तीन पटकको एसिया कप च्याम्पियन हो । प्रशिक्षक दासकै नेतृत्वमा गत महिना मलेसियामा नै भएको इस्टर्न रिजन च्याम्पियन बन्दै नेपाल यू–१९ एसिया कपका लागि छनोट भएको थियो ।