मोहाली (एजेन्सी) – भारतीय ओपनर रोहित शर्माले श्रीलंका विरुद्धको दोस्रो एक दिवसीय खेलमा दोहोरो शतक बनाएका छन् । २ सय ८ रन बनाएका रोहितको एक दिवसीय करियरमा यो तेस्रो दोहोरो शतक हो ।
एक दिवसीय क्रिकेटमा दोहोरो शतक बनाउन सफल रोहितसहित केवल ५ खेलाडि पर्छन् – सचिन तेन्डुल्कर, विरेन्द्र सेहवाग, क्रिस गेल र मार्टिन गप्टिल । यी सबै खेलाडिको नाममा एकएक दोहोरो शतक रहेको छ भने रोहितको यो तेस्रो दोहोरो शतक हो ।
यस अघि रोहितले सन् २०१३ मा अष्ट्रेलिया विरुद्ध २ सय ९ रन बनाएका थिए । त्यस्तै सन् २०१४ मा श्रीलंका विरुद्ध नै रोहितले बनाएका २ सय ६४ रन एक दिवसीय क्रिकेटको इतिहासमै सबैभन्दा उच्च स्कोर हो ।
आज रोहितको १ सय ५३ बलको पारीमा १३ चौका र १२ छक्का सामेल थिए । उनको योग्दानसँगै भारतले निर्धारित ५० ओभरमा ४ विकेटको क्षतिमा ३ सय ९२ रन बनाएको हो । रोहितलाई पहिलो विकेटका लागि शिखर धवनले ६८ रन बनाउँदै र दोस्रो विकेटका लागि श्रेयस ऐयरले ८८ रन बनाउँदै राम्रो साथ दिएका थिए ।
टस जितेर पहिले फिल्डिङ रोजेको श्रीलंकाले अब ३ सय ९३ रनको लक्ष्य पछ्याउने छ । तीन खेलको सिरिजमा श्रीलंका पहिलो खेल जित्दै १-० ले अगाडि रहेको छ ।
