काठमाडौं (हाम्रो खेलकुद)– डीजे मार्समेलोलाई ल्याउने भन्दै टिकट बिक्री गर्ने काठमाडौंको दरबारमार्गस्थित डेजाभू नाइट क्लबका सञ्चालकसहित ८ जना पक्राउ पर्नेमा क्रिकेट खेलाडी पृथु बास्कोटा पनि छन् । 

आज पक्राउ पर्नेमा क्लबका सञ्चालक पृथुसहित जयन श्रेष्ठ, मयंक खड्का, विशाल डाँगी, मिलन श्रेष्ठ, डिजाइनर राजीव महर्जन, क्लबका क्याप्टेन आकाश न्यौपाने र इभेन्ट म्यानजमेन्ट कम्पनी केटिएम लाइभका रितेश माडवाडी छन् । उनीहरुलाई प्रहरीको महानगरीय अपराध महाशाखाले पक्राउ गरेको हो । पृथु केहि दिनअघि मात्र इपिएलको सहभागि टोली चितवन चाइगर्सको कप्तान नियुक्त भएका थिए ।

६ टोलीको सहभागितामा इपिएल सोमबारदेखि कीर्तिपुरस्थित त्रिभुवन विश्वविद्यालयको मैदानमा सुरु हुँदैछ । सुवास खकुरेल चोटका कारण खेल्न नसक्ने र अहिले पृथु पक्राउ परेपछि त्यसको असर चितवन टाइगर्सलाई पर्ने सम्भावना छ । पूर्व निर्धारित कार्यक्रम अनुसार मार्समेलो क्लबमा उपस्थित नभएपछि गए राति डेजाभू क्लबमा तोडफोड समेत भएको थियो । तोडफोडबाट क्लबमा क्षति पुगेको बताइएको छ ।

मार्समेलो ल्याउने भन्दै क्लबले ४ हजार भन्दा टिकट विक्री गरेको र डीजे मार्समेलोलाई क्लबमा उतार्न नसकेपछि पक्राउ गरेको जानकारी दिदै महाशाखाका प्रमुख दिवेश लोहनीले उनीहरुविरुद्ध मुद्दा चलाइने हाम्रो खेलकुद डटकमलाई जानकारी दिएका छ्न् । पृथुले आज विहान चितवन टाइगर्सका अन्य खेलाडीसँग मुलपानी मैदानमा अभ्यास समेत गरेका थिए ।