काठमाडौं (हाम्रो खेलकुद) – नेपाल थाइल्यान्डमा एसीसी यू–१६ इष्टर्न रिजन क्रिकेट प्रतियोगिताको फाइनलमा पुगेको छ । ट्रेडथाई क्रिकेट मैदान बैंककमा आज मलेसियालाई ७२ रनले हराउँदै नेपाल उपाधि नजिक पुगेको हो । नेपालले दिएको १ सय २८ रनको लक्ष्य पछ्याएको मलेसिया २१.१ ओभरमा सबै विकेट गुमाएर ५५ रनमा समेटिएपछि नेपालले अन्तिम दुईको यात्रा तय गरेको हो ।

सुरुवात राम्रो गरेपनि मलेसियाले त्यसलाई लामो समय अघि बढाउन सकेन । मलेसियाले एक समय १ विकेट गुमाउँदा २४ रन बनाएको थियो । तर, बलिङमा नेपाली टोली हावी भएपछि मलेसियाले बाँकी ३१ रन जोड्दा बाँकी ९ विकेट गुमायो । मलेसियाका ओपनर सन्देश सुपरामनियमले सर्वाधिक १६ रन बनाउनुबाहेक अन्य ब्याट्सम्यानले दोहोरो योगफलमा रन बनाउन सकेनन् ।

मोहम्मु शाहिद बिन र मुहाम्मद अमिरुलले समान ८ रन बनाए । मलेसियालाई सस्तैमा समेट्न नेपालका सुर्य तामाङले ४ तथा प्रतिश जिसीले ३ विकेट लिए । अजय कुमार लोनिया र कुशल मल्लले समान १ विकेट लिए ।

त्यसअघि टस हारेर पहिले ब्याटिङ गरेको नेपालले निर्धारित ३४ ओभरमा ८ विकेट गुमाएर १ सय २७ रनको मध्यम स्कोर बनाएको हो । वर्षाले मैदान भिजेका कारण खेल एक ओभर छोट्याइएको थियो । समूह चरणमा उत्कृष्ट खेल पस्केको नेपालले मलेसियाविरुद्धको सेमिफाइनलमा भने कमजोर ब्याटिङ प्रदर्शन गरेपनि १ सय रन कटाउन सफल भयो ।

अघिल्लो क्रममा ब्याट्सम्यानहरु कम स्कोरमै समेटिएपनि आठौं नम्बरमा ब्याटिङमा आएका प्रतिश जिसीले सर्वाधिक २५ रन बनाउनु बाहेक अन्य ब्याट्सम्यानले राम्रो प्रदर्शन गर्न सकेनन । २२ बलको सामना गरेका जिसीले एक चौका प्रहार गरे । यस्तै नारायण जोशी र सुनिल भण्डारीले समान १७ रन बनाए । विशाल बिक्रम केसीले १५ रन बनाए ।

तृतराज दास १३ रनमा आउट हुँदा अघिल्लो खेलमा शतक बनाएका कप्तान रित गौतम र राजन मगर समान ११ रनमा पभेलियन फर्किए । ओपनर कुशल मल्ल ६ रनमा आउट भए । निखिल कुमार सिंह ६ तथा सुर्य तामाङ १ रनमा अविजित रहे । नेपाललाई कम स्कोरमा रोक्ने क्रममा मलेसियाकबा मोहमद अफिकले सर्वाधिक ३ विकेट लिए । अस्लम खान मलिकले दुई तथा सामसुल इकमल, भिजय उन्नी र मुहम्मद अमिरुलले समान १ विकेट लिए ।

अब नेपालले उपाधिका लागि सोमबार सिंगापुरसँग प्रतिस्पर्धा गर्नेछ । सिंगापुरले शनिबारै हङकङलाई ८ विकेटले पराजित गर्दै फाइनलमा पुगेको हो । नेपालले यसअघि एसीसी यू १९ इस्टर्न रिजन क्रिकेट प्रतियोगिताको उपाधि जितेको थियो ।