काठमाडौं (हाम्रो खेलकुद)– विभागीय टोली नेपाल एपिएफ क्लब राजधानीमा जारी एक्सेल्सिया प्रधानमन्त्री कप एक दिवसीय राष्ट्रिय क्रिकेट प्रतियोगिताको सेमिफाइनलमा पुगेको छ । मुलपानी क्रिकेट मैदानमा सोमबार भएको खेलमा एपिएफले प्रदेश २ माथि डग वर्थ लुईस नियमको आधारमा ९६ रनले पराजित गर्दै अन्तिम चारमा स्थान बनाउन सफल भएको हो ।

एपिएफले दिएको ३ सय ४० रनको विशाल लक्ष्य पछ्याउदै गर्दा वर्षा भएपछि प्रदेश २ ले २८ ओभरमा २ सय २ रनको लक्ष्य पाएको थियो । तर, प्रदेश २ ले निर्धारित २८ ओभरमा ९ विकेट गुमाएर १ सय ५ रनमात्र बनाउन सक्यो । उसका लागि हरि शंकर शाहले सर्वाधिक ३८ रन जोडे । अर्का ओपनर सुरज पटेलले ३४ रन जोडेपनि अन्य ब्याट्सम्यानले राम्रो खेल्न नसक्दा पराजित हुन पुग्यो ।

प्रदेश २ लाई सस्तैमा समेट्न एपिएफका करण केसी र बसन्त रेग्मीले समान ३ विकेट लिए । कमलसिंह ऐरी, भुवन कार्की र रोहित कुमार पौडेलले समान १ विकेट लिए ।
यसअघि टस जितेर पहिले ब्याटिङ गरेको एपिएफले प्रदीप ऐरी र सुवास खकुरेलको उत्कृष्ट शतकीय इनिङ्समा ६ विकेट गुमाएर ३ सय ३९ रनको विशाल योगफल तया पारेको थियो ।

अनिल कुमार शाहलाई ३ रनमा गुमाएपनि सुवास खकुरेल र प्रदीप ऐरीको जोडीले दोस्रो विकेटको लागि २ सय ३१ रनको ठूलो साझेदारी गरेका थिए । सुवासले १ सय ३ रनको शतकीय इनिङ्स खेले । प्रदीप ऐरीले १ सय ५८ रनको योगदान दिए । प्रदीपको यो राष्ट्रिय प्रतियोगिताको सबैभन्दा ठुलो स्कोर हो ।

पृथु बास्कोटा २९ रनमा नटआउट रहे । भुवन कार्कीले १६ रन जोडे । प्रदेश २ का दिभ्यान्सु मल्लिकले ५ विकेट लिए । राहुल प्रताप सिंहले १ विकेट लिए । लगतार तेस्रो जित निकालेको एपीएफ समूह ‘ए’ मा शीर्ष स्थानमा उक्लिएको छ । उसले आर्मीलाई नेट रन रेटमा पछि पारेको हो ।

सोमबारै मुलपानीमा भएको खेलमा प्रदेश ५ ले प्रदेश ३ माथि डगवर्थ लुईस नियमकै आधारमा ३० रनको जित निकाल्यो । प्रदेश ३ ले दिएको १ सय ५३ रनको लक्ष्य पछ्याउदै गर्दा प्रदेश ५ ले जवाफी ब्याटिङ गरिरहँदा वर्षा भएपछि खेल २१ ओभरमा झारिदा ६० रनको नयाँ लक्ष्य पाएको थियो । जतिबेला प्रदेश ५ ले ३ विकेट गुमाएर ८९ रन बनाइसकेको थियो ।

सन्दीप सुनार ३८ रनमा रिटायर्ड हर्ड भए । शंकर राना १९, शक्ति गौचन १५ र अन्तिम थापाले १० रन जोडे । किशोर महतो र अभिषेक झाले समान १ विकेट लिए ।यसअघि टस जितेर पहिले ब्याटिङ गरेको प्रदेश ३ ले ४४ ओभर ५ बलमा सबै विकेट गुमाएर १ सय ५२ रनमात्र बनाउन सक्यो । उसका लागि ओपनर भुपेन्द्र थापाले ४६ रन बनाए ।

रुपेश श्रीवास्तव २१ रनमा नटआउट रहे । जितेन्द्र ठकुरी १८, आदिल खान १६ र सञ्जय बस्नेतले १५ रन जोडे । प्रदेश ५ का लाल अधिकारीले ४ विकेट लिए । कृष्ण कार्की, सन्दीप सुनार र बिक्रम भुषालले समान २ विकेट लिए । जितपछि ३ खेलबाट ५ अंक जोडेर प्रदेश ५ समुह ‘बी’ को शीर्ष स्थानमा छ ।