एजेन्सी – वेस्टइन्डिजसँगको तीन वान डे सिरिज घरेलु टोली भारतले जितेको छ । आइतबार राती वेस्ट इन्डिजलाई तेस्रो तथा अन्तिम वान डे खेलमा ४ विकेटले हराउँदै भारतले सिरिज २–१ ले जितेको हो ।

जितमा लागि ३ सय १६ रनको विशाल लक्ष्य पछ्याएको भारतले ४८.४ ओभरमा ६ विकेट गुमाउँदै पुरा गर्यो । भारतको जितमा कप्तान विराट कोहलीले सर्वाधिक ८५ रनको योगदान दिए । ४७ औं ओभरको पहिलो बलमा किमो पलले बोल्ड आउट गनु अघि विराटले ८१ बलमा ९ चौका प्रहार गरे ।

ओपनर रोहित शर्माले ६३ बलमा ८ चौका र १ छक्का सहित ६३ रन जोडे । रोहितलाई जेसन होल्डरले विकेटकीपर शाई होपबाट कट बिहान्ड क्याच आउट गराएका थिए । त्यस्तै अर्का ओपनर लोकेश राहुलले ७७ रनको उत्कृष्ट इनिङ खेले । अल्जारी जोसेफले शाई होपबाट क्याच आउट गराउनु अघि लोकेशले ८९ बलमा ८ चौका र १ छक्का प्रहार गरे ।

रोहित र लोकेशले २१.२ ओभरमा १ सय २२ रनको साझेदारी गर्दै राम्रो सुरुवात दिएका थिए । श्रेयस ऐर र ऋषभ पन्त समान ७ रनमा आउट भए । रविन्द्र जडेजा ३१ बलमा ४ चौका सहित ३९ रनमा अविजित रहे । शार्दुल ठाकुर ६ बलमा २ चौका र १ छक्का सहित १७ रन जोड्दै जित पक्का गरे । वेस्ट इन्डिजका लागि किमो पलले ९.४ ओभरमा ५९ रन खर्चेर ३ विकेट लिए । अज्जारी जोसेप, जेसन होल्डर र शेल्डन कट्रेलले १–१ विकेट लिए ।

त्यसअघि कटकस्थित बरबती स्टेडियममा टस हारेर ब्याटिङ थालेको वेस्टइन्डिजले निर्धारित ५० ओभरमा ५ विकेट गुमाउँदै ३ सय १५ रन जोडेको थियो । कप्तान काइरान पोलार्ड र निकोलस पुरनले अन्तिम ओभरतिर आक्रामक ब्याटिङ गरेपछि वेस्टइन्डिजले ३ सय रनको आँकडा पार गरेको थियो । अन्तिम ३ ओभरमा मात्र वेस्टइन्डिजले ५३ रन जोडेको थियो ।

ओपनर एभिन लेविसले २१ र शाइ होपले उत्कृष्ट लयलाई कायम राख्दै ४२ रनको योगदान दिएपछि वेस्टइन्डिजले मध्यम सुरुवात पाएको थियो । रोस्टन चेजले ४८ बलमा ३८ र शिम्रन हेटमायारले ३३ बलमा ३७ रन जोड्दै वेस्टइन्डिजको रनगतिलाई अगाडी बढाएका थिए । चेज ३२ औं ओभरको तेस्रो बलमा नवदीप सैनीको बलमा बोल्ड हुँदा वेस्ट इन्डिज १४४-४ को स्थितिमा थियो ।

त्यसपछि पुरन र पोलार्दले पाँचौ विकेटका लागि १ सय ३५ रनको साझेदारी गरे । पुरनले ६४ बलमा ८९ रनको आक्रामक इनिङ खेले । उनले १० चौका र ३ छक्का प्रहार गरेका थिए । कप्तान पोलार्डले ५१ बलमा नटआउट ७४ रन जोड्ने क्रममा ३ चौका ७ छक्का प्रहार गरे । जेसन होल्डर ७ रनमा नटआउट रहे ।

भारतका लागि सैनीले २ विकेट लिँदा शार्दुल ठाकुर, मोहमद शामी र रविन्द्र जडेजाले १-१ विकेट हात पारे । सैनीको यो ओडीआईमा डेब्यू खेल हो । पहिलो खेलमा वेस्ट इन्डिजले भारतलाई ८ विकेटले हराएको थियो । दोस्रो खेलमा भने भारत १ सय ७ रनले विजयी भएको छ । भारतले तीन टि ट्वान्टी सिरिज पनि २-१ ले जितेको थियो ।