एजेन्सी – तीन एक दिवसिय सिरिज अन्तर्गत पहिलो खेलमा भारतले अष्ट्रेलियालाई २ सय ५६ रनको मध्यम लक्ष्य दिएको छ । मुम्बईको वानखडे रंगशालामा टस हारेर ब्याटिङ थालेको घरेलु टोली भारत ४९.१ ओभरमा अल आउट हुँदै २ सय ५५ रनमा समेटियो ।

पाँचौ ओभरको तेस्रो बलमा मिचेल स्टार्कले ओपनर रोहित शर्मालाई डेविड वार्नरवाट १० रनमा क्याच गराए ।दोस्रो विकेटका लागि शिखर धवन र लोकेश राहुलले २७.१ ओभरमा १ सय २१ रनको साझेदारी गर्दै भारतको इनिङ उकासेका थिए ।

एस्टन अगरले २८ औं ओभरको पहिलो बलमा राहुललाई स्टिभ स्मिथबाट ४७ रनमा क्याच गराउँदै शतकिय साझेदारी तोडे । राहुलले ६१ बलमा ४ चौका प्रहार गरे । २९ औं ओभरको पाचौं बलमा प्याट कमिन्सले शिखर धवनलाई ७४ रनमा अगरबाट क्याच गराउँदै अष्ट्रेलियालाई खेलमा फर्काए।

धवनले ९१ बलमा ९ चौका र १ छक्का प्रहार गरे । स्पिनर एडम जम्पाले ३२ औं ओभरको दोस्रो बलमा कप्तान विराट कोहलीलाई १६ रनमा कट एण्ड बोल्ड आउट गरेपछि भारत दबाबमा आएको थियो ।

लगातै ३३ औं ओभरको पाचौं बलमा स्टार्कले श्रेयस ऐरलाई ४ रनमा एलेक्स करिबाट क्याच गराए । केन रिचड्सनले रबिन्द्र जडेजालाइ करिबाट २५ रनमा क्याच आउट गराए । जडेजाले ३२ बलमा २ चौका र १ छक्का प्रहार गरे ।

४४ औं ओभरको दोस्रो बलमा कमिन्सले विकेटकिपर ऋषभ पन्तलाइ २८ रनमा एस्टन टर्नरबाट क्याच गराए । पन्तले ३३ बलमा २ चौका र १ छक्का प्रहार गरे । शादुल ठाकुरले १३ रनको योगदान दिए । मोहम्मद शामी १० र कुलदिप यादवले १७ रन बनाए ।

अष्ट्रेलियाका तीब्र गतिका बलर मिचेल स्टार्कले १० ओभरमा ५६ रन खर्चेर ३ विकेट लिए । प्याट कमिन्सले १० ओभरमा १ मेडन सहित ४४ रन खर्चेर २ विकेट लिए । केन रिचड्सन २, एडम जम्पा र एस्टन अगरले १-१ विकेट लिए ।