सुनसरी (हाम्रो खेलकु) – युवा ब्याट्सम्यान तथा त्रिभुवन आर्मीका कुशल मल्ल सुनसरीको इनरुवामा जारी मनमोहन मेमोरियल एक दिवसिय क्रिकेट प्रतियोगितामा उत्कृष्ट ब्याट्सम्यान घोषित भएका छन् ।

आर्मीलाई उपाधि दिलाउन महत्त्वपूर्ण प्रर्दशन गरेका कुशलले ४ खेलमा १ सय ९६ रन बनाएका थिए । उनले एपीएफ विरुद्ध १ सय ११, इनरुवाविरुद्ध ३५, सेमिफाइनलमा प्रदेश ३ विरुद्ध ३७ र फाइनलमा पुलिस विरुद्ध १३ रन जोडेको थिए ।

आर्मीका स्पिनर सुसन भारी म्यान अफ द सिरिज चुनिए । सुसनले ४ खेलमा २९.४ ओभरमा ८५ रन खर्चेर १५ विकेट लिए । एपीएफविरुद्ध १, इनरुवा विरुद्ध ह्याट्रिक सहित ७ विकेट र प्रदेश ३ विरुद्ध ३ विकेट लिए । त्यस्तै फाइनलमा पुलिस विरुद्ध ४ विकेट लिएका थिए ।

सुदूरपश्चिम प्रदेशका बायाँ हाते स्पिनर विनोद लामा उत्कृष्ट बलर चुनिए । उनले ३ खेलमा १४ विकेट लिएका थिए । उनले मलेसिया-११ विरुद्ध ४, गण्डकी प्रदेशविरुद्ध ७ र पुलिस विरुद्ध ३ विकेट लिएका थिए ।

प्रतियोगिताको सर्वोत्कृष्ट खेलाडी घोषित सुसनले ५५ हजार, उत्कृष्ट ब्याट्सम्यान कुशल मल्ल र बलर विनोद लामाले समान २१-२१ हजार नगद प्राप्त गरे । शनिबार फाइनलमा आर्मीले पुलिसलाई ८५ रनले हराउँदै उपाधि जितेको थियो ।