काठमाडौं (हाम्रो खेलकुद) – ओपनर म्याक्स ओडाउडले नेदरल्यान्ड्सको इतिहासमा पहिलो टि२०आई शतक प्रहार गर्दा नेदरल्यान्ड्सले त्रिकोणात्मक टि२० सिरिजमा मलेसिया १५ रनले पराजित भएको छ ।

ओडाउडको शतकमा नेदरल्यान्ड्सले प्रस्तुत गरेको १ सय ९२ रनको लक्ष्य पछ्याउने क्रममा विरानदीप सिंहले आक्रामक ब्याटिङ गरेपनि टोलीलाई जितसम्म डोर्याउन भने सकेनन् । मलेसियाले २० ओभरमा ८ विकेट गुमाउँदै १ सय ७६ रन जोड्यो । मलेसियाका लागि मध्यक्रमका ब्याट्सम्यान विरानदीपले ५३ बलमा ८७ रन जोडे । उनले ६ चौका र ६ छक्का प्रहार गरे । उनी १९ औं ओभरको चौथो बलमा सर्ट थर्ड म्यानको हातबाट क्याच आउट भए ।

मलेसियाले ओपनर सायद अजिज (७ रन), अनवर अरुदीन (६ रन) र कप्तान अहमद फाइज (शून्य) लाई सस्तैमा गुमाएको थियो । एक समय २०-३ को स्थितिमा रहेको मलेसियालाई शार्विन मुनिआन्दी र विरानदीपले ५८ रनको साझेदारी गर्दै उकासेका थिए । शार्विनले २० बलमा २८ रन जोड्ने क्रममा ४ चौका र १ छक्का प्रहार गरे ।

तल्लोक्रममा अमिनुदीन राम्लीले १५ बलमा २ चौका र २ छक्कासहित २६ रन जोड्दै विरानदीपलाई साथ दिएपनि मलेसियाले जित हासिल गर्न सकेन । विरानदीप आउट भएसँगै मलेसियाको जितको आशा समाप्त भएको थियो । नेदरल्यान्ड्सका आर्यन दत्त, बास डे लिड र सबास्टियन ब्राटले २-२ तथा पिटर सिलार र फिलिपे बोसेभेनले १-१ विकेट हात पारे ।

त्यसअघि टस जितेर ब्याटिङ रोजेको नेदरल्यान्ड्सले निर्धारित २० ओभरमा २ विकेट गुमाउँदै १ सय ९१ रन जोडेको थियो । नेदरल्यान्ड्सका लागि ओडाउडले ७३ बलमा १ सय ३३ रन जोडे । उनले १५ चौका र ६ छक्का प्रहार गरे । उनलाई बेन कुपरले अर्को एन्डबाट राम्रो साथ दिएका थिए । कुपर २० बलमा २ चौकासहित २० रन जोड्दै नटआउट रहे । यी दुईले तेस्रो विकेटका लागि नटआउट १ सय २५ रनको साझेदारी गरे ।

ओडाउडले ५९ बलमा शतक पूरा गरेका थिए । उनले सायद अजिजको बलमा पोइन्टमा छक्का प्रहार गर्दै शतक पूरा गरेका थिए । ओडाउड नेदरल्यान्ड्सका लागि टि२० अन्तर्राष्ट्रिय शतक प्रहार गर्ने पहिलो खेलाडी पनि बने । यसअघि वर्तमान कप्तान पिटर शिलारको ९६ रनको स्कोर नै सर्वाधिक थियो ।

त्यसअघि तेस्रो ओभरमा नै टोबियास भिसलाई पवनदीप सिंहले १ रनमा बोल्ड गरेका थिए । ओपनर ओ’डाउड र स्कट एडवार्ड्सले दोस्रो विकेटका लागि बलियो साझेदारी गर्दै राम्रो अवस्थामा पुर्याए । उनीहरुले ३८ बलमा ४९ रनको साझेदारी गरेका थिए ।

एडवार्ड्स २३ बलमा ३१ रन जोड्दै अनवर रहमानको एलबीडब्लू धरापमा परे । उनले ३ चौका र १ छक्का प्रहार गरेका थिए ।

यस जितसँगै नेदरल्यान्ड्सको पनि २ अंक भएको छ । नेपालको पनि २ अंक छ र रनरेटको आधारमा नेपाल शीर्षस्थानमा छ । नेपालले अब दोस्रो खेलमा सोमबार मलेसियाको सामना गर्नेछ ।

नेदरल्यान्ड्सको टोली : पिटार सीलार (कप्तान), टोबियस भिसे, बेन कुपर, म्याक्स ओडिवड, बास डी लीडे, स्कर्ट एडवार्डस, आर्यन दत्त, फिलिपे बोइससेवेन, भिभिन किंगमा, टोनी स्टल, सेबस्टियान ब्राट

मलेसियाको टोली : अहमद फेज, विरनदिप सिंह, अमिनुदीन राम्ली, अनवर अरुदीन, अनवर रहमान, खिजार हायत, मुहमद वाफिक, शर्विन मुनींदी, पवनदीप सिंह, शफिक सरिफ, सायद अजिज