काठमाडौं (हाम्रो खेलकुद) – टियु क्रिकेट मैदानमा जारी नेपाल, मलेसिया र नेदरल्यान्ड्ससँगको त्रिकोणात्मक टि२० आई सिरिजका बाँकी खेलमा दर्शकलाई प्रवेशमा निषेध गरिएको छ ।

नेपाल क्रिकेट संघ (क्यान) ले एक प्रेस विज्ञप्ती जारी गर्दै नेपालमा कोभिड १९ को बढ्दो असरलाई कम गर्न वैशाख ६ गते सम्पन्न नेपाल सरकारको मन्त्रीपरिषद्को बैठक अनुसार दर्शक सहितको खेलकुद सञ्चालन गर्न नपाइने आदेशसँगै त्रिकोणात्मक सिरिजमा दर्शक प्रवेशमा रोक लगाईएको जनाएको छ । सोमबार दर्शक प्रवेश गर्न नपाइने बताएपनि टियु क्रिकेटमा समर्थकको उपस्थित बाक्लो थियो । पहिलो खेलमा नेदरल्यान्ड्सविरुद्ध ५ हजार भन्दा बढी दर्शक थिए ।

दुई युवा ओपनर आसिफ शेख र कुशल भुर्तेलले लगातार उत्कृष्ट प्रदर्शन गरेपछि नेपालले नेदरल्यान्ड्स र मलेसियालाई ९–९ विकेटले पराजित गरेको थियो । सिरिजको दोस्रो खेलमा नेदरल्यान्ड्सले मलेसियालाई १५ रनले पराजित गरेको थियो । सिरिजको चौथो खेलमा मंगलबार नेपाल र नेदरल्यान्ड्सबीच प्रतिस्पर्धा हुने छ । जुन खेल वन्द रंगशालामा हुने छ ।

बन्द मैदानमा नेपाललाई केहि घाटा हुन सक्छ । समर्थकको कारण नेपालले विपक्ष्य खेलाडीलाई दबाबमा राख्दै आएको थियो । नेदरल्यान्ड्सका ओपनर म्याक्स ओडाउडले मलेसियाविरुद्ध १ सय ३३ रनको अविजित शतकीय इनिङ खेलेपछि बोल्नेक्रममा समर्थकको हल्लाको कारण आफ्नो केहि ध्यान गुमेको हुन सक्ने बताएका थिए ।

डबल राउन्ड रोविनको आधारमा चल्ने त्रिकोणात्मक सिरिजको शीर्ष दुई टोली फाइनल खेल्ने छन् । फाइनल वैशाख ११ मा हुने छ । नेपाल २ खेलमा ४ अंकका साथ शीर्ष स्थानमा छ । नेदरल्यान्ड्स २ खेलमा २ अंकका साथ दोस्रो र मलेसिया पुछारमा छन् ।