भुपेन्द्र जिसी, काठमाडौं

एभरेष्ट प्रिमियर लिग (इपिलए) मा आइतबार भैरहवा ग्ल्याडियटर्सबाट पोखरा राइनोजविरुद्ध बायाँ हाते तीव्र गतिका बलर दुर्गेश गुप्ताले सानदार डेब्यू गरे । भैरहवा बलियो स्थितिमा रहँदा खेल वर्षाको कारण नतिजाविहिन बन्यो । तर दुर्गेशले दमदार प्रदर्शन गर्दै धेरैको मन जिते र ध्यानआफूतिर आकर्षित गरे ।

टियु मैदानमा टस जितेर पहिला ब्याटिङ थालेको पोखरा १०.१ ओभरमा ६५–७ को अवस्थामा वर्षाको कारण खेल रोकिएको थियो । त्यसपछि खेल हुन नसक्दा अंक बाँड्नु परेको थियो । संकटको अवस्थामा पुगेको पोखरालाई वर्षा ठूलो राहत बन्यो । भैरहवाको लागि घातक बलिङ गरेका दुर्गेशको प्रदर्शन भने केहि ओझेलमा पर्यो ।

भैरहवाले खेलमा दुई युवा खेलाडीलाई डेब्यू क्याप दिएको थियो । दुर्गेशलाई श्रीलंका पूर्व तीव्र गतिका बलर धाम्मिका प्रसादले डेब्यू क्याप दिएका थिए । अर्का युवा चाइनाम्यान स्पिनर तुलबहादुर थापाले बंगलादेशका सर्वाधिक सफल ओपनर तमिम इकबालबाट सो क्याप पाएका थिए ।

बायाँ हाते दुर्गेशले डेब्यू खेलको आफेनो पहिलो र टोलीको दोस्रो ओभरमै सानदार बलिङ गरे । टियु एन्डबाट धामीका प्रसादले बलिङ गर्दै पोखरालाई दबाबमा राखेका थिए । लगत्तै चोभार एन्डबाट बलिङमा आएका उनीबारे धेरैलाई थाहा थिएन । विशेषगरी उनले आफ्नो गतिले मैदानमा उपस्थित सबैको ध्यान तानेका थिए ।

दोस्रो बलमा पोखराका विपिन रावलले उनको बल ठम्याउन नसक्दा टप एज लागेर चौका गएको थियो । पाँचौ बलमा भने उनले विपिनलाई प्रदीप ऐरीबाट ९ रनमा क्याच आउट गराए । प्वाइन्टमा प्रदीप ऐरीले उत्कृष्ट क्याच लिँदै दुर्गेशलाई डेब्यू विकेट दिलाएका थिए । लगत्तै अर्को बलमा दुर्गेशले पोखरा कप्तान तथा नेपाली क्रिकेट टोलीका विकेटकिपर विनोद भण्डारीलाई बोल्ड गर्दै गोल्डेन डकमै पेभिलिएन फर्काए । दुर्गेशले विनोदको लेग स्टम्प उडाइदिएका थिए । फाइन लेगमा सट खेल्न खोजेका विनोद दुर्गेशको गतीमा बिट भएपछि बोल्ड हुनु परेको थियो ।

चौथो ओभरमा दुर्गेशलाई ह्याट्रिको अवसर थियो । तर सुनिल धमलाले पहिलो बल संयमित रुपमा रोकेका थिए । ह्याट्रिक बलबाट बचेपनि दोस्रो बलमा दुर्गेशको गती चाल पाउन नसक्दा बोल्ड आउट हुन पुगे । दुर्गेशले विकेट मेडन राख्दै डेब्यूलाई अझ यादगार बनाए । छैटौं ओभरको पहिलो बलमा श्रीलंका असेला गुणरत्नेले लङअफमा उत्कृष्ट छक्का प्रहार गरेका थिए । समग्रमा दुर्गेशले ३ ओभरमा १ मेडन सहित १ मेडन सहित १६ रन खर्चेर ३ विकेट लिएका थिए । वर्षाको कारण आफ्नो स्पेल पूरै गर्न पाएनन् । तर उनको डेब्यू सम्झनलायक हुन पुग्यो ।

दुर्गेशले आफू निरन्तर मिहिनेत गरिरहेका कारण डेब्युमा विकेट लिन पाउँदा खुसी लागेको बताए । ‘इपिएल जस्तो ठूलो प्रतियोगितामा मौका पाएपछि खुसी त पक्कै थिएँ । आफूलाई प्रमाणित गर्ने मौका थियो । र मैले प्रमाणित पनि गरें’, उनले भने ।

‘विकेट लिँदा त्यो कप्तान होस् वा जो सुकै होस् खुसी लागिहाल्छ । मेरो काम सहि लेन्थ र लाइनमा बल फ्याल्ने थियो । विकेट आयो । त्यो अझ राम्रो भयो’, उनले सुनाए ।

डेब्यु खेलमा नै दुर्गेश एक समय ह्याट्रिकनजिक पुगेका थिए । तर उनले आफूले ह्याट्रिक नसोचेको बताउँछन् । ‘आफ्नो सामान्य बल फाल्छु भन्ने नै थियो । विकेट आए ठिक छ नत्र केहि छैन भनेर बल फालेको थिएँ’, उनले भने ।

यस प्रदर्शनले आगमी दिनमा राम्रो गर्नेमा आत्मविश्वास बढेको उनी बताउँछन् । यस प्रदर्शनलाई लिएर धेरै सोच्न चाहदैनन् । आगामी दिनमा पोखराविरुद्ध नतिजा दोहोराउन खोज्ने बताए । भारतको नयाँ दिल्लीबाट दुई साता अघिमात्र इपिएल खेल्न नेपाल आएका थिए । बलिङ प्रशिक्षणको लागि उनले त्यहाँ तीन महिना बिताएका थिए ।

को हुन् दुर्गेश गुप्ता ?

दुर्गेशको जन्म कपिलबस्तु बाणगंगामा भएको हो । बुबा शेषराम र आमा कौसल्या गुप्ताको तेस्रो सन्तानको रुपमा जन्मिएका हुन् । उनका एक दिदी र दाई छन् । उनी क्रिकेट सिक्न र खेल्न भनेरै ६–७ वर्षदेखि भैरहवामा रहँदै आएका छन् । भैरहवामा लुम्बिनी खुकुरी क्रिकेट क्लबबाट खेल्दै आएको छन् । क्रिकेट खेल्नकै लागि भैरहवामा कोठा लिएर बस्न थालेको ६–७ वर्ष भएको दुर्गेश बताउँछन् । क्रिकेटमा लाग्न परिवारको सबैभन्दा ठूलो साथ र सहयोगले सम्भव भएको बताउँछन् । उनको परिवार सानैदेखि क्रिकेटर बनाउन चाहन्थें ।

‘परिवारको धेरै साथ र सहयोग छ । क्रिकेटमा मेरो परिवारले गर्दा यो स्थानमा छु । परिवारले जति खर्च लागेपनि सहयोग गर्नुभएको छ । म जे छु परिवारको कारण छु’, उनले भने । उनलाई परिवारको सबै जनाले सानैदेखि क्रिकेटर बनाउन चाहेको बताए ।

दुर्गेशले २०१७ को पहिलो संस्करणको धनगढी प्रिमियर लिग रुपन्देही च्यालेन्जर्सबाट खेलेका थिए । धनगढीविरुद्ध खेल्ने मौका पाउँदा एक विकेट लिएका थिए । १ ओभरमा १६ रन खर्चेर १ विकेट लिएका थिए । त्यसपछि उनले घरेलु क्रिकेटमा मौका पाउन सकेनन् ।

दुर्गेशले गत माघमा भएको प्रधानमन्त्री एकदिवसिय क्रिकेट प्रतियोगिता लुम्बिनी प्रदेशबाट छनोट रुपन्देहीबाट खेलेका थिए । दुर्गेशसँगै दाङका तीव्र गतिका बलर कमल वली र बर्दिया अलराउन्डर विक्रम केसी लुम्बिनी प्रदेश टोलीमा नपरेपाछि छनोट समितिको आलोचना भएको थियो ।

पिएम कपमा नपर्नुमा आफूनै सायद टिमको लागि योग्य नभएको हुन सक्ने उनी बताउँछन् । ‘म मा केहि कमी कमजोरी थियो होला र परिन । अहिले ती कमजोरी सुधार गरेपछि टोलीमा परेको छु । मैले त्यसबेला प्रदर्शन नगरेरै परिन होला भन्ने लाग्छ’, उनले भने ।

दुर्गेश इपिएल खेल्न सेप्टेम्बर १६ मा नेपाल आइपुगेका थिए । पुबुदु गत वर्ष नै भैरहवा ट्यालेन्ट हन्टको लागि नेपाल आएका थिए । उक्त ट्यालेन्ट हन्टमा राम्रो प्रभाव छाडेपछि पुबुदुले दुर्गेशसहित तीन खेलाडी छनोट गरेका थिए । अघिल्लो महिना भैरहवाले न्यूनतम मूल्य ५० हजारमा दुर्गेशलाई अनुबन्ध गरेको थियो । दुर्गेशले तल्लोक्रममा राम्रो ब्याटिङको क्षमता पनि राख्छन् ।

दुर्गेशले नेपालबाट उमेर समूह क्रिकेट भने खेलेनन् । २०२० मा नेपाली यू१९ टोलीले भारत भ्रमण गर्दा दुर्गेश नेपालको वैकल्पिक सूचिमा थिए । दुर्गेश अवसर नपाउँदा ओझेलमा परेका थिए । तर इपिएलको पहिलो खेलमा सानदार प्रदर्शन गर्दै आफ्नो क्षमता देखाएका गरेका छन् । अब उनले शीर्ष स्तर क्रिकेटका लागि तयार भएको प्रमाणित गर्न नियमित प्रदर्शन गर्नुपर्ने हुन्छ ।

यो पनि : डेब्यु विकेटमै तुलबहादुरको ‘रोनाल्डो सेलेब्रेसन’