काठमाडौं (हाम्रो खेलकुद)– त्रिभुवन आर्मी क्लबकी मिस्ली श्रेष्ठले प्रथम कृष्णप्रसाद भट्टराई स्मृति राष्ट्रिय कराते प्रतियोगिताको महिला ५० केजी तौल समूहमा स्वर्ण पदक जितेकी छिन् ।

ललितपुर सातदोबाटोस्थित कराते हालमा जारी प्रतियोगिताको दोस्रो दिन शुक्रबार मिस्लीले फाइनलमा लुम्बिनी प्रदेशकी अनिता पुन मगरलाई १२–४ ले हराउँदै च्याम्पियन बनेकी हुन् । प्रतियोगितामा आर्मीको यो दोस्रो स्वर्ण पदक हो । यसअघि शुक्रबार नै १३ औं दक्षिण एसियाली खेलकुद (साग) की स्वर्ण पदक विजेता कुसुम खड्काले ५० केजी तौल समूहमा आर्मीका लागि पहिलो स्वर्ण पदक दिलाएकी थिइन् ।

१३ औं सागमा ५० केजी तौल समूहमा स्वर्ण पदक जितेकी अनु अधिकारीले पनि जारी प्रतियोगितामा भाग लिएकी छैनन् । पहिलो खेलमा नेपाल पुलिस क्लबकी जिया कार्कीलाई ४–० ले हराएकी मिस्लीले सेमिफाइनलमा एपिएफकी एलिना विकेलाई ३–२ ले पराजित गरेकी थिइन् । रजत पदक जितेकी अनिताले पहिलो खेलमा प्रदेश १ की विपना राईलाई ५–१ ले र सेमिफाइनलमा बागमतीकी सोनु श्रेष्ठलाई ११–३ ले हराउँदै फाइनल यात्रा तय गरेकी थिइन् । सो तौल समूहमा सोनु र एलिनाले कास्य पदक जिते ।

१७ मध्ये अहिले सम्म ८ स्वर्ण पदकको छिनोफानो भइसकेको छ । जसमा पुलिसले सर्वाधिक ४, आर्मीले २, एपिएफ र प्रदेश १ ले समान १ स्वर्ण पदक जितेका छन् । शुक्रबार नै पुलिसका बिप्लवलाल श्रेष्ठले ८४ केजी माथिको तौल समूहमा स्वर्ण पदक जितेका थिए । नेपाल लोकतान्त्रिक खेलकुद संघ र ललिलपुर जिल्ला प्रमुख डोजोको संयुक्त आयोजनामा भएको प्रतियोगितालाई राष्ट्रिय खेलकुद परिषद् (राखेप) र नेपाल कराते महासंघले १९ औं एसियाली खेलकुदको प्रारम्भिक छनोटको मान्यता दिएको छ ।

शनिबार सम्म चल्ने प्रतियोगितामा ७ प्रदेश, ३ विभाग (सेना, प्रहरी र एपिएफ) का २ सय १० खेलाडीको सहभागिता रहेको छ । महिलातर्फ ८ र पुरुषतर्फ ९ इभेन्ट्समा २१ स्वर्ण, २१ रजत र ४२ कास्य पदकका लागि प्रतिस्पर्धा हुनेछ । प्रतियोगितालाई सम्झना ल्याबले मुख्य प्रायोजन गरेको छ । लिनिङ र सान सोजु सह प्रायोजक रहेको प्रतियोगितालाई ललितपुर महानगरपालिका, गोदावरी नगरपालिका,बागमती गाउँपालिका र क्लासिक डायमण्ड सहयोगकी रुपमा रहेका छन् ।