एजेन्सी – पहिलो हाफमै गावोनका फरवार्ड पिएरे इमरिक औवामियाङको गोलमा क्याटलान क्लब बार्सिलोनाले स्पेनिस ला लिगामा झिनो जित निकालेको छ ।

बार्सिलोनाले घरेलु टोली रियल सोसिडाडलाई १–० ले पराजित गरेको हो । औवामियाङले ११औं मिनेटमा गोल गर्दै टोलीलाई महत्वपूर्ण ३ अंक दिलाए । रियाले एरिना डोनोसटिया सान सेवास्टिएनमा बिहीबार राति भएको प्रतिस्पर्धात्मक खेलमा औवामियाङको गोलपछि थप गोल निस्कन नसक्दा बार्सिलोना विजयी हुन सफल भयो ।

खेलको सुरुवातमै पछि परेको घरेलु टोली रियल सोसिडाडले बल पोसेसन राख्दै बार्सिलोनालाई दवाव बढाएपनि गोल गर्न नसक्दा पराजित हुन पुग्यो । ११औं मिनेटमा औसमाने डेम्वेलेको प्रहार क्रसबारमा लागेर फर्कदा बार्सिलोना अग्रता लिनबाट चुक्यो ।

लगत्तै ११औं मिनेटमै फेरान टोरेसको हेडर पासमा औवामियाङले गोल गर्न सफल भएका थिए । १६औं मिनेटमा ड्यानी आल्भेसको प्रयास सफल भएन । २८औं मिनेटमा फ्रान्की डि जोङको २५ यार्ड टाढाको प्रहार पोस्ट नजिकैबाट बाहिरियो ।

४८औं मिनेटमा एलेक्सान्डर सोर्लाेथले गोलको सुवर्ण अवसर गुमाउँदा घरेलु टोली बराबरीबाट चुक्यो । ५८औं मिनेटमा गोलरक्षक मार्क आन्दर टेर स्टेगनले बार्सिलोनाको अर्काे संकट टारे । ६९औं मिनेटमा एडनान जानुजाजको अर्काे प्रयासमा गोलरक्षक टेर स्टेगन नै बाधक बने ।

यो जितसँगै दोस्रो स्थानमा रहेको बार्सिलोनाको ३२ खेलबाट ६३ अंक पुगेको छ । एक खेल कम खेलेको बार्सिलोना शीर्षस्थानको रियल म्याड्रिडभन्दा १५ अंकले पछि छ । समान ६३ अंक नै रहेपनि सेभिया गोलअन्तरमा तेस्रो स्थानमा रहेको छ । पाँचौ स्थानमा उक्लने मौका गुमाएको पराजित सोसिडाड ५५ अंक जोडेर छैटौं स्थानमा यथावत रहेको छ ।

ला लिगामै अर्काे खेलमा सेभियाले घरेलु टोली लेभान्टेलाई ३–२ ले पराजित गर्दै शीर्षचारमा रहने सम्भावना बलियो बनाएको छ । सेभियाको जितमा जेसस कोरोनाले दुई तथा जुलेस कुन्डेले एक गोल गरे । घरेलु टोली लेभान्टेका जोस लुइस मोरालेस र रोबर्टाे सोल्डाडोले समान एक गोल गरे । जोस लुइस मोरालेस पेनाल्टीमा चुक्दा लेभान्टे पनि बराबरीबाट चुक्यो ।

यो जितसँगै सेभिया ३३ खेलबाट ६३ अंक जोडेर तेस्रो स्थानमा यथावत रहेको छ । पराजित लेभान्टे २५ अंक जोडेर १९औं स्थानमा रहेको छ ।