काठमाडौं (हाम्रो खेलकुद) – एसीसी यू१९ एसिया कपको तयारीमा रहेको नेपाल यू-१९ टोलीले कर्नाटक यू१९ विरुद्धको पहिलो अभ्यास खेलमा पराजित भएको छ ।

मुलपानी क्रिकेट मैदानमा कर्नाटकले नेपाली टोलीलाई १ विकेटले पराजित गरेको हो । जितका लागि १ सय १४ रनको लक्ष्य कर्नाटकले ९ विकेट गुमाउँदै ३२ औं ओभरमा पूरा गर्यो ।

सामान्य लक्ष्य पछ्याउने क्रममा सुरुवाती २ बलमै २ विकेट गुमाएको कर्नाटक एक समय २४-४ को स्थितिमा थियो । तर त्यसपछि नेपाली बलरले विकेट निकाल्न सकेनन् ।

कर्नाटकका लागि रोहितले ६३ बलमा ३३ रन जोडे । जितका लागि २ रन बाँकी रहँदा युनिशको बलमा बोल्ड भएका उनले २ चौका प्रहार गरे । प्रज्वल गोडाले २३ बलमा २ चौकासहित २८ रन बनाए । पाँचौ विकेटका लागि रोहित र प्रज्वलले ५० रनको साझेदारी गरेका थिए ।

१ सय १२ रन पुग्दा लगातार ४ विकेट गुमाएपछि कर्नाटक केही दबाबमा परेको थियो । ११२-५ को स्थितिबाट टोली ११२-९ मा पुग्दा केही दबाब थियो तर प्रणवले २ रन जोड्दै जित दिलाए ।

नेपालका लागि हेमन्त धामीले र सन्तोष यादवले ३-३ विकेट लिँदा युनिश ठकुरीले २ तथा विपिन महतो १ विकेट लिए ।

टस हारेर पहिलो ब्याटिङको निम्तो पाएको नेपालले २७.२ ओभरमा अलआउट हुँदै १ सय १३ रनमात्र जोड्न सक्यो । मध्यक्रमले बिर्सनलायक ब्याटिङ गरेपछि नेपाल कम स्कोरमा समेटियो । कर्नाटकका स्पिनर इसा पुथिगेले ५ विकेट लिँदै कर्नाटकलाई बलियो बनाएका थिए ।

नेपालका लागि ओपनर आकाश त्रिपाठीले सर्वाधिक २७ रन जोडे । उनले ५३ बलमा ४ चौका प्रहार गरेका थिए । १४ औं ओभरमा आकाश आउट हुँदा नेपाल ५७-३ को अवस्थामा थियो । तर त्यसपछि स्पिनरविरुद्ध निरन्तर विकेट खस्दा नेपाल संकटमा पर्यो ।

ओपनर अर्जुन कुमाल ६ रन जोड्दै पाँचौ ओभरमा आउट भएका थिए भने नरेन भट्ट १ रन जोड्दै सातौं ओभरमा पेभेलियन फर्किए । आकाश र सन्तोषले २८ रनको साझेदारी गर्दै केहीबेर इनिङ सम्हाले ।

१६ औं ओभरको अन्तिम २ बलमा सन्तोष यादव (१०) र रोशन विक (०) लगातार बलमा आउट भए । लगत्तै १७ औं ओभरको दोस्रो बलमा उत्तम मगर पनि खाता नखोली फर्किए ।

दिलसाद अली १ रन जोड्दै आउट भएपछि नेपाल ८१-७ को अवस्थामा पुगेको थियो । तल्लोक्रममा नरेन साउदले १३ रन र युनिश ठकुरीले १२ रन जोड्दै नेपाललाई १ सय रनको आँकडा पार गराए ।

कर्नाटकका पुथिगेले ८ ओभरमा २ मेडनसहित ३१ रन खर्चेर ५ विकेट लिए । तेजसले २ विकेट लिँदा मनोज, प्रणव र ध्रुवले १-१ विकेट लिए ।

५ खेलको सिरिजको सबै खेल मुलपानी क्रिकेट मैदानमा आयोजना हुँदैछ । दोस्रो खेल शुक्रबार हुनेछ भने हरेक खेलपछि एक दिन विश्राम रहेको छ ।