पोखरा (हाम्रो खेलकुद) – सूर्य नेपाल वेस्टर्न ओपनको २५औं संस्करणको उपाधि पहिलो पटक निरज तामाङले जितेका छन् ।

निरजले समग्रमा १-अन्डर २०६ स्कोर जोड्दै जयराम श्रेष्ठलाई तीन स्ट्रोकले हराए । अन्तिम दिन ४-ओभर ७३ को खराब प्रदर्शनका बाबजुद पनि उनले तीन स्ट्रोकको जित निकालेका हुन् ।

उपाधिसँगै १ लाख ५० हजार जितेका उनको यो करियरको तेस्रो उपाधि हो । यसअघि उनले इस्टर्न ओपन जितेका थिए । गत सिजन उनले काठमाडौं ओपनको उपाधि हात पारेका थिए ।

हिमालयन गल्फ कोर्समा अन्तिम १८ होलको खेल सुरूवात गर्दा निरज भुवन कुमार रोक्का भन्दा मात्र एक स्ट्रोकले अगाडि थिए। त्यसैले फाइनल दिनको प्रतिस्पर्धा रोमाञ्चक हुने अनुमान गरिएको थियो। तर अन्तिम ग्रुपमा रहेका सुमन र सञ्जय लामले खेल बिगार्दा निरजको जित सहज बन्यो।

पहिलो चार होलमा पार बचाएका निरजले पाँचौं देखि सातौं होलमा लगातार तीन बोगी खेपे। फ्रन्ट नाइन ३-ओभर ३७ मा सकाए। यसपछि १०औं होलमा बर्डी प्रहार गरेपनि ११औं र १८औं होलमा एक-एक सट खेर फाल्दै। ब्याक नाइन १-ओभर ३६ मा पुरा गरे।

दोस्रो दिनको खेल सकिंदा संयुक्तरुपमा पाँचौं स्थानमा रहेका जयरामले इभन-पार ६९ स्कोर गर्दा दोस्रो स्थान प्राप्त गरे। उनले दिनको सुरूवात भने ट्रीपल बोगीबाट गरे‌। लगतै तेस्रो होलमा बोगी खेपे। छैटौं र नवौं होलको बर्डीको सहयोगमा फ्रन्ट नाइन २-ओभर ३६ मा सकाए। यसपछि ब्याक नाइनमा चार बर्डी र दुई बोगी प्रहार गरे। १०औं होलमा बर्डी प्रहार गरे भने १२औं होलमा बोगीको सामना गरे। यसपछि १५औं देखि १७औं खेलमा लगातार तीन बर्डीको सफलता प्राप्त गरे। अन्तिम होलमा एक सट खेर फाल्दा ब्याक नाइन २-अन्डर ३३ मा सकाए। दोस्रो हुँदै उनले नगद एक लाख प्राप्त गरे।

समग्रमा ३-ओभर २१० को नतिजामा भुवन कुमार रोक्काले तेस्रो स्थानमा चित्त बुझाए। आज उनले ७-ओभर ७६ को खराब प्रदर्शन गरे। उनले ७५ हजार पुरस्कार पाए। नेपाल नम्बर एक प्रो भुवन नगरकोटीले आज २-अन्डर ६७ को स्कोत दर्ज गरे। समग्रमा ४-ओभर २११ सहित चौथो हुँदा ६३ हजार प्राप्त गरे।

एमेच्योरतर्फ सुरेश तामाङले उपाधि जिते। आज इभन-पार ६९ बनाएका उनले समग्रमा ९-ओभर २१६ सहित सुमन परियारलई दुई स्ट्रोकले हराए। समग्रमा ११-ओभर २१८ सहित सुमन काउन्ट ब्याकमा दोस्रो भए। उनले आज ३-ओभर ७२ स्कोर गरे।

प्रतियोगिताका विजयी खेलाडीहरुलाई सूर्य नेपाल प्रालिका महाप्रबन्धक केशव प्रधान, गण्डकी प्रदेश गल्फ संघका अध्यक्ष इन्द्रधारा बिष्ट, कास्की जिल्ला गल्फ संघका अध्यक्ष जिवा राम गुरूङले पुरस्कार वितरण गरे।

५४ होलको तीन दिने प्रतियोगितामा ३४ प्रोफेसनल र १८ एमेच्योर गरी कुल ५२ गल्फरहरूले भाग लिएका थिए। प्रतियोगिताको कुल पुरस्कार राशी ८ लाख ८२ हजार रहेको थियो। भोलि प्रो-एम प्रतियोगिता हुनेछ।