काठमाडौं (हाम्रो खेलकुद)- जन जी आन्दोलनका स्थगित एभरेष्ट महिला भलिबल लिग (इडब्लुभी) को बाँकी खेल आज सुरु हुँदैछ।

त्रिपुरेश्वरस्थित राष्ट्रिय खेलकुद परिषद्को कभर्ड हलमा आज दुई खेल हुनेछन्। कर्णाली यशविसले र मधेश युनाइटेडबीच पहिलो खेल हुनेछ। खेल दिउँसो ३ बजे सुरु हुने बताइएको छ ।

त्यस्तै साँझ ५ बजे सुरु हुने खेलमा शीर्ष स्थानको ललितपुर क्विन्स र पोखरा निन्जाजबीच हुनेछ। पोखरामा इडब्लुभीको‌ दोस्रो संस्करण जारी रहँदा भदौं २३ र २४ को‌ आन्दोलनका कारण स्थगित भएको थियो।

लिगको १६ मध्ये ९ खेल पोखरा भईसकेको थियो ।
आजबाट सुरु हुने खेलमा भने विदेशी खेलाडी हुने छैनन्। हरेक टोलीमा रहेका ९ खेलाडीबाट खेल सक्ने सहमति अनुसार बाँकी खेल हुने इडब्लुभीका प्रतियोगिता संयोजक जगदिश भट्टले‌ जानकारी दिए।

हरेक टोलीले मार्की, ७ खेलाडी अक्सन, १ खेलाडी ट्यालेन्ट हन्ट र ३ विदेशी खेलाडी लिएका थिए। ‘विदेशी खेलाडी पुनः ल्याउनका लागि केहि समय पनि लाग्ने देखियो ।

प्रतियोगिता अप्रत्याशित रोक्नु परेकोले यसलाई चाहिँ टुंगाउनु पर्छ भन्ने भयो, भट्टले भने,यहि अवस्थामा जसरी सकिन्छ सम्पन्न गरौं भन्ने भएपछि अघि बढेका हौं।’ इडब्लुभीमा ६ टोली सहभागी छन्। गत वर्ष कर्णालीले उपाधि जितेको थियो।