पुलिसविरुद्ध संकटालाई अग्रता

काठमाडौं (हाम्रो खेलकुद) – पल्सर सहिद स्मारक ए डिभिजन लिग अन्तर्गत मंगलबार जारी खेलमा सीएमजी क्लब संकटाले नेपाल पुलिस क्लबविरुद्ध पहिलो हाफमा २-१ को अग्रता लिएको छ ।

खेलको चौथो मिनेटमा पुलिसका भोला सिलवालको प्रहारलाई गोलरक्षक राजाबाबु थापाले उत्कृष्ट बचाउ गरे । पेनाल्टी क्षेत्रको ठिक भित्रबाट भोलाको हाफ भली प्रहार राजाबाबुले पहिलो पोस्टमा बचाए ।

संकटाले खेलमा सुरुवाती अग्रता लियो । खेलको २९ औं मिनेटमा सरोज दाहालले लक्ष्मण रुचालको कर्नरमा गोल गर्दै संकटालाई अगाडी बढाए । ३६ औं मिनेटमा संकटाले अग्रता दोब्बर पार्यो ।

तेज तामाङ र दीनेश राजवंशीबीच मैदानको बीच भागमा समन्वय नमिल्दा नितिन थापामगरले बल खोस्दै एलोन म्यक्स्वेललाई दिए । एलोनले दिएको थ्रु बलमा दिपेश आले मगरले गोलरक्षक सत्रुघन चौधरीलाई समेत छलाउँदै गोल गरेर २-० को अग्रता दिलाए ।

पुलिसले त्यसको एक मिनेटमै गोल गर्दै अग्रता कम गर्यो । अभिषेक रिजालको पासमा रवी पासवानले पेनाल्टी क्षेत्रभित्रबाट गोल गर्दै स्कोर २-१ को स्थितिमा ल्याए ।

पुलिस जारी लिगमा चौथो जितको खोजीमा छ भने संकटा पाँचौ जित दर्ता गर्ने लक्ष्यमा छ । संकटाले अग्रता जोगाएको खण्डमा शीर्ष स्थानको मनाङ मर्स्याङदीसँग अंक बराबरी गर्नेछ ।